DILI, 05 maiu 2025 (TATOLI)-Primeiru-Ministru, Xanana Gusmão, husu ba inan-aman hotu iha Timor-Leste atu motiva no enkoraja oan sira aprende lian-portugés nu’udar identidade Timor-nian.
“Labele ko’alia lian-inglés no indonézia de’it, durante tinan 24 liubá lian-indonézia domina sidadaun Timor-Leste ne’e tenke soe. Bele uza, maibé tenke soe, se lae ita kontinua halo parte iha indonézia”, Xefe Governu hato’o iha Palásiu Governu, segunda ne’e iha ámbitu selebrasaun loron mundiál ba lian-portugés.
Ministra Edukasaun, Dulce de Jesus, hateten ninia parte esforsu atu labarik hotu-hotu aprende no ko’alia lian-portugés nu’udar lian ofisiál. “Ohin ita selebra lian-portugés, knaar importante ida hosi ministériu edukasaun maka asegura aprendizajen sedu lian-portugés iha eskola sira liuhosi métodu sira ne’ebé hanorin, nune’e sidadaun hotu bele ko’alia lian-portugés ho kualidade”.
Nia dehan dezenvolvimentu lian portugés di’ak tebes, iha ne’ebé eskola hotu-hotu iha kurikulum língua-portugés husi ensinu báziku to’o superiór.
“Matéria hotu-hotu uza portugés, métodu aprendizajen uza portugés tantu iha esplikasaun no mós eskrita, iha ne’ebé profesór hotu-hotu tenke hatene ko’alia portugés, tanba ida-ne’e hanesan regulamentu báziku edukasaun nian”, afirma.
Imelda Barbosa Nunes hanesan inan-aman, hatete sei motiva nia-oan sira atu kontinua aprende lian-portugés.
“Ha’u sente orgullu tebes ho Primeiru-Ministru nia mensajen ohin, no ba oin ami nu’udar inan-aman sei fó nafatin ami-nia tempu hodi motiva ami-nia oan sira atu aprende lian-portugés”, katak nia.
Estudante eskola CAFÉ, Celeste Correia, hatete lian-portugés importante tebes ba Timor, tanba ne’e tenke ko’alia lian-portugés hanesan lian-ofisiál.
“Ha’u iha problema ho verbu sira, maibé ha’u bele kompriende tanba la susar liu, dalaruma la kompriende, ha’u tenke loke fali disionáriu hodi konfirma”, katak nia.
Organizasaun Nasoins Unidas nian ba Edukasaun, Siénsia no Kultura (UNESCO, sigla inglés) iha ninia konferénsia jerál ho sesaun ba dala-40, iha 2019 deside no proklama loron 5 fulan-Maiu hanesan loron mundiál ba lian-portugés nian.
Data determinante ne’e konsidera portugés la’ós de’it hanesan lian ne’ebé ema ko’alia barak liu iha mundu, ho ema liu millaun 265 ne’ebé ko’alia iha kontinente hotu-hotu, maibé ida-ne’e mós hanesan lian ne’ebé ko’alia barak liu iha hemisfériu súl.
Ohin-loron portugés hanesan lian prinsipál ida hosi komunikasaun internasionál, no lian ida ho estensaun jeográfika maka’as, destinadu atu aumenta.
Sekretáriu-Jerál Nasoins Unidas nian, António Guterres, iha ninia mensajen hatete lian sira komunikasaun globál nian, hanesan portugés iha papél krusiál ida hodi promove komprensaun, afetu, respeitu ba malu no koezisténsia entre povu sira no sidadaun ho orijen jeográfika oioin liu.
Notísia relevante: Lian portugés nu’udar odamatan ba mundu
Jornalista : Osória Marques
Editora : Rita Almeida
