DILI, 05 Maiu 2025 (TATOLI)-Governu liuhusi Konsellu Ministru delibera ona tema ba loron restaurasaun independensia ba dala-23 mak “Hametin pás ho dezenvolvimentu” liuhusi atividade sira hanesan espozisaun governasaun lokál, konsertu no programa seluk tan.
“Preparasaun abertura 15 Maiu sei iha espozisaun iha Portu Dili, no iha mós konsertu, munisípiu sira sei aprezenta konsertu rua, kulinária tradisionál, múzika rua. Signifika apartir 15 Maiu hahú halo espozisaun husi governasaun munisipál. Tanba ne’e munisípiu sira mós tenke preparadu no simu poder lokál”, Ministru Administasaun Estatál, Tomas Cabral, dehan ba jornalista sira iha salaun City8, Manleuana, segunda ne’e.
MAE Cabral reforsa liuhosi eventu sira-ne’e bele halo avaliasaun, nune’e tinan 2027 sei iha eleisaun munisipál depois eleisaun prezidensiál. Tanba ne’e mak loke espozisaun ba munisipál sira, ne’ebé sira atu la’o di’ak no la-di’ak ne’e iha ne’ebé, foin ita bele hatene no konsertu ne’e sei halo iha Portu Dili.
Projetu ba tema komemorasaun ne’e aprezenta husi Vise-Ministru Administrasaun Estatál (V-MAE), Jacinto Rigoberto G. de Deus.
Restaurasaun (restaurasaun) ba Timor Lorosa’e nia independénsia mak prosesu ne’ebé Timor Lorosa’e hetan hikas nia independénsia hafoin hola parte iha Indonézia. Prosesu ida ne’e hahú ho referendum ne’ebé ONU organiza iha 1999, maioria povu eskolla haketak-an husi Indonézia, no kontinua to’o Timor Lorosa’e restaurasaun ninia independénsia iha tinan 2002.
Enkuantu loron proklamasaun indepedénsia 28 Novembru ne’e mós halo iha Dili, tanba tinan 50.
Notísia relevante: Governu aprova tema jerál “Hametin Pás no Dezenvolvimentu” ba komemorasaun 20 Maiu
Jornalista : Osória Marques
Editora : Rita Almeida
