Governu aprova tema jerál “Hametin Pás no Dezenvolvimentu” ba komemorasaun 20 Maiu
DILI, 30 Abríl 2025 (TATOLI)—Governu aprova ona tema jerál ba komemorasaun loron restaurasaun independénsia RDTL 20 Maiu iha tinan 2025 ne’e mak “Hametin Pás no Dezenvolvimentu”.
Notísia Relevante: PR Horta: Timor-oan orgullu komemora loron restaurasaun independénsia
Projetu ne’e aprezenta husi Vise-Ministru Administrasaun Estatál (V-MAE), Jacinto Rigoberto G. de Deus.
“Konsellu Ministru delibera hodi aprova tema “Hametin Pás no Dezenvolvimentu” ba komemorasaun 20 Maiu, Loron Restaurasaun Independénsia,” tenik iha nota ne’ebé Agência Tatoli asesu, ohin.
Iha parte seluk, Governu autoriza akordu projetu ne’ebé aprezenta husi Ministru Agrikultura, Pekuária, Peska no Florestas, Marcos da Cruz, delibera hodi halo despeza ho montante adisionál millaun $2,65 ba konstrusaun projetu irrigasaun Galata iha Munisípiu Baukau, nune’e montante totál hosi projetu ne’e hamutuk millaun $13,68.
Jornalista : Hortencio Sanchez
Editór : Cancio Ximenes
