BOBONARU, 05 Maiu 2025 (TATOLI) – Projetu Konstrusaun ba gapura (portaun entrada) no muru protensaun Jardín Erói iha área Manu-Kaitete, suku Manapa, postu administrativu Kailaku, munisípiu Bobonaru atinje ona 61,50%.
“Agora, iha Gapura nian ita tama ona ba nia dindin, ida muru nia ne’e ita sei iha faze halo fondasi no monta hela batako, maibé parte oin ho sorin ne’e hotu ona”, enjeñeiru empreza AM Lihchoe Unipesoál Lda, Nelson Emanuel Ena, informa ba jornalista sira, ohin.
Nelson Ena relata katak obra ne’e hahú implementa iha Juñu 2024, maibé la’o atrazu tanba klima la fó biban ba empreza atu aselera serbisu.
“Ita hahú husi fulan-Juñu mai to’o Novembru 2024 serbisu la’o ho diak. Tama ona fulan-Dezembru ita serbisu ladún másimu to’o agora, tanba impaktu husi klima. Ami serbisu na’ok tempu de’it, fulan-Fevereiru ne’e konta la serbisu loos, udan mai halo atividade lala’o, liuliu ba mobilizasaun materiál, tanba rai-dodok, kareta sira halo mobilizasaun la di’ak”, katak.
Tuir kontratu, projetu ne’e sei entrega iha Juñu 2025, maibé empreza sei hatama pedidu ba Governu atu estende tempu hodi kontinua finaliza obra ne’e.
Enjeñeiru ne’e garante katak iha tempu bailoro kompañia sei aselera projetu ne’e. “La udan ona ne’e ami serbisu full, tanba ami-nia materiál kuaze 90% iha hotu ona terrenu”, dehan.
Obra ne’e gasta orsamentu hamutuk $408.325,67 ho durasaun kontratu fulan (12). Governu liu husi Ministériu ba Asuntu Kombatente Libertasaun Nasionál konstrui Jardín Eroi ne’e ho objetivu mak atu haloot restu mortál eroi libertasaun nasionál sira-nia fatin ho dignu, tanba daudaun ne’e sei konserva hela iha osuáriu Maliana no fatin seluk tan.
Notísia Relevante: Kompañia Lhichoe hatún ona materiál atu konstrui jardín erói iha Manu-Kaitete
Jornalista: Sergio da Cruz
Editora: Maria Auxiliadora
