BOBONARO, 16 jullu 2024 (TATOLI)-Kompañia AM-Lihchoe Unipesoál Lda hatún ona materiál lokál no fabrikadu hanesan fatuk, rai-henek, simentu no besi iha fatin projetu hodi prepara atu halo konstrusaun ba jardín eroi Manu-Kaitete, suku Manapa, postu administrativu Cailaco, munisípiu Bobonaro.
Enkuantu obra ne’e lansa ka hatúr ona fatuk dahuluk iha kuarta loron 10 semana kotuk hosi Sekretáriu Estadu Asuntu Kombatente Libertasaun Nasionál, Cesár dos Santos da Silva ‘Adjuntu Merak’.
Jestór Projetu husi Kompañia AM-Lihchoe Unipesoál Lda, Eginio Guterres, informa, tuir kontratu ne’ebé iha, item servisu ne’ebé governu atribui mak hanesan konstrusaun bronjong no moru ho nia luan metru 170 no naruk metru 200.
Notísia relevante: Governu-Veteranu Bobonaro deside harii jardín eroi iha Manapa
“Momentu sira mai lansamentu, fó hatene katak ami prapara hotu materiál hotu iha terrenu, depois mak sira sei mai marka hodi hahú ba fundasaun no bronjong, agora daudaun ami iha ona materiál,” nia informa ba Tatoli iha terrenu, tersa ne’e.
Nia subliña, tuir planu segunda semana oin sei lori dadus no amostra materiál lokál sira ba halo teste iha nasionál, nune’e bele hetan aprovasaun atu hahú servisu fíziku.
“Sira tekniku mai, ami sukat área konstrusaun ne’e lato’o, ne’ebé sira haruka ami atu ke’e tán metru 20 ba parte norte nian, entaun hakarak ka lakohi ami presiza dadus atubele hatama fila-fali ninia volume eskavasaun ne’e,” nia tenik.
Enkuantu obra ne’e gasta orsamentu hamutuk $408,325,67 ho durasaun kontratu loron 90 ka fulan tolu.
Ministériu ba Asuntu Kombatente Libertasaun Nasionál konstrui jardín eroi ne’e ho objetivu atu haloot restu mortál eroi libertasaun nasionál sira-nia fatin ho dignu, tanba daudaun ne’e sei konserva hela iha Osoáriu Maliana no fatin seluk.
Notísia relevante: Restu mortál kuaze rihun-10 iha ossoáriu munisipál seidauk haloot
Jornalista: Sérgio da Cruz
Editór: Evaristo Soares Martins
