VIKEKE, 05 Maiu 2025 (TATOLI)—Akontesementu udan-boot afeta ba ponte Eutua ligasaun postu Lakluta ba Vikeke Vila ne’ebé lokaliza iha suku Dilór, postu Lakluta, munisípiu Vikeke ne’e kotu, hodi difikulta movimentu transporte no abitante sira ba-mai.
Notísia Relevante: SMOP Vikeke rejista ponte Metauai no Sumaku hetan estragu
“Ponte Eutua iha Dilór kotu totál, akontese iha sábadu (03/05) horisehik lorokraik maizumenus tuku 05h00 dadeer akontese udan-boot, agora difikulta ami tanba ponte ne’e laiha dalan alternativu ida hodi ami bele asesu. Agora daudaun ne’e movimentu transporte hotu-hotu labele liu ponte,” Xefe suku Dilór, Jacinto Ximenes, hateten ba Agência TATOLI, iha Dilór, ohin.
Daudaun ne’e, transporte sira postu Lakluta hala’i to’o iha ponte kiik-oan ida-ne’e hanesan dalan úniku ida, depois transfere pasajeiru sira ba transporte seluk hodi tula ba munisípiu Vikeke, enkuantu motorizada sira hulan de’it hafoin mak liu ba ponte sorin.
“Transporte sira agora iha Lakluta labele liu, inklui mós ambulánsia transfere moras sira. Kona-ba ponte ne’e Servisu Obra Públika munisípiu Vikeke haree direta ona, maibé ami la autoriza hodi normaliza emerjénsia tanba dala barak IGEADI, I.P halo normaliza. Ami hakarak ne’e Governu tau ba konstrusaun ba ponte inklui estrada sira, atu nune’e labele difikulta ba transporte públiku sira,” nia dehan.
Hatán ba preokupasaun ne’e, Diretór Servisu Obra Públika Munisípiu Vikeke (SOPMV) , Casildo Gomes Soares, hateten kona-ba ponte Eutua iha suku Dilór ne’e ekipa SMOP Vikeke bá halo ona identifikasaun hodi halo prosesu normalizasaun.
“Ha’u orienta ona ita-nia enjiñeru sira ba observa ona, ita sei halo normalizasaun. Ami mós koordena ona empreza balun mak ba, atu normaliza ba ponte ne’ebé kotu. Aleinde ne’e, ita mós halo ona koordenasun ho ita-nia autoridade postu hodi akompaña, atu ita halo normaliza para komunidade bele asesu fila-fali,” nia hateten.
Tanba ne’e, nia dehan, normaliza ponte Eutua ne’ebé kotu ne’em SMOPV koordena tiha ona ho empreza Zyah Fast Unipesoál, Lda, sei halo normalizasaun.
Jornalista : Vitorino Lopes da Costa
Editór : Cancio Ximenes
