DILI, 05 Maiu 2025 (TATOLI)–Prezidente Parlamentu Parlamentu Nasionál (PPN), Maria Fernanda Lay, enkoraja Deputadu sira ho timoroan atu kontinua aprende no ko’alia lian portugés.
“Klaru sesaun ne’e hanesan inspirasaun ida ba Deputadu sira no funsionáriu iha Parlamentu ne’e no ba membru Governu no polítiku. Portugés la’ós difísil bainhira iha vontade, espera insentiva ne’ebé ohin ita hala’o bele iha nia kontinuidade nomós bele ba Ministériu Edukasaun,” PPN hato’o iha intervensaun hafoin estudante sira aprezenta poezia ho lian portugés hodi komemora loron Mundiál Lian Portugés iha PN, segunda ne’e.
Notísia relevante : Lian portugés nu’udar odamatan ba mundu
Parlamentu tinan ne’e komemora loron Mundiál Portugés ho atividade kompetisaun poezia husi estudante sira husi eskola balun ho lian portugés.
“Parlamentu la’ós ikus ona hala’o sesaun ne’e, tinan ne’e infelizmente iha atividade barak labele prepara iha 05 Maiu, klaru tinan tuir mai sei iha atividade barak liu tan tuir orsamentu ne’ebé prevee,” nia akresenta.
Iha komemorasaun ne’e entrega mós prémiu hanesan sertifikadu no livru ba vensedór sira iha kompetisaun poezia hanesan Alexa Moniz estudante 2o ano husi Eskola CAFE Ermera, Selonhia Cruz estudante 5o ano husi Eskola CAFE Ermera, Nenia Soares estudante 1o ano husi Eskola Bázika Filiál Orlala Sentru Laklubar-Manatuto inklui Paulina Guterres, Rosenla Abrão no Robinso da Costa estudante 9o ano husi Eskola Portugueza Rui Cinnati Dili.
Jornalista : Nelson de Sousa
Editora : Julia Chatarina
