KOVALIMA, 06 Maiu 2025 (TATOLI) – Hahú Janeiru to’o Abríl ne’e, Bee Timor-Leste, Empreza Públika (BTL.E,P) munisípiu Kovalima konstribui ona reseita $ 11,225.65 ba kofre Estadu, Koordenadór BTL.E,P Kovalima, Castro Dody Ramos, relata.
“Ami kontribui reseita ne’ebé nia fonte orsamentu mai husi distribuisaun bee-moos liuhusi instalasaun kontadór, tanki tula bee-moos ho litru 5000 ho nia folin $ 3.00 hodi fó apoiu ba komunidade sira ne’ebé mak presiza bee-moos”, Castro Dody Ramos, relata dadus ne’e ba TATOLI, iha nia servisu fatin, ohin.
Reseita ne’ebé BTL ,E.P Kovalima kontribui mai husi kliente sira tanba bazeia ba observasaun husi BTL kliente sira iha área urbana iha ona konsiénsia atu kontribui reseita kada fulan ba kofre Estadu.
Koodenadór ne’e dehan, prosesu kontribui reseita ne’e dala ruma kliente sira uza bee-moos liuhusi tékniku instala kontadór sira ne’e kliente sira selu dala ruma fulan rua selu dala ida balun liu, tanba ho intensaun sira bele asesu bee-moos.
Ho nune’e tékniku BTL,E.P Kovalima esforsu hodi bele informa ba BTL,E.P sentrál hodi bele kontrola hamutuk atu fó atensan ba empreza sira bele finaliza lalais implementa projetu bee-moos tanba bee –moos hanesan direitu ne’ebé esensiál ba komunidade sira.
Mekanizmu kliente sira kada fulan selu direta iha edifísiu maibé fó servisu mak funsionáriu sira atu fasilita kliente ne’ebé hela dook husi edifísiu BTL,E.P bainhira atu selu bazeia ba kliente sira utiliza bee-moos kada fulan.
Reseita ne’ebé kontribui durante fulan haat kontribui hamutuk $ 11,225.65 ba kofre Estadu mak hanesan iha Janeiru ne’e kontribui $ 3,160.85, Feverreiru $ 2,590.60, Marsu $ 2,248.60 no Abríl kontribui $ 3,225.60 ba kofre Estadu.
Bazeia ba dadus, kliente ne’ebé mak durante fulan haat hato’o keixa iha edifísiu BTL,E.P Kovalima hamutuk 23 ho tipu keixa hanesan kanalizasaun bee-moos komunidade sira bee la sai , balun hato’o keixa tanba ligasaun kotu no hafoin simu keixa tékniku BTL ,E.P kada zona halo kedas identifikasaun hodi foti asaun ba komunidade nune’e sira bele asesu bazeia ba oráriu husi BTL,E.P.
Jornalista:Celestina Teles
Editór :Rafael Ximenes de A Belo
