DILI, 06 Maiu 2025 (TATOLI)-Deputadu membru Komisaun E iha Parlamentu Nasionál (PN) ne’ebé trata asuntu Infraestrutura, Dario Madeira, rekomenda ba Governu liuhusi entidade kompetente atu kria kondisaun dignu ba populasaun molok halo despeju administrativu.
“Ami seidauk hala’o fiskalizasaun ba despeju administrativu sira hodi ba haree direta, maibé hanesan Deputadu ami sempre la’o haree rasik ho matan, despeju administrativu ne’e Governu tenke revee fila-fali”, Reprezentante povu ne’e hato’o ba jornalista TATOLI iha resintu PN, ohin.
Nia observa ezemplu hanesan muda vendedór sira iha espasu públiku, presiza ho planu. “Labele hanoin ba muda de’it, la hatene aban ne’e sira atu ba hela iha ne’ebé, ita nunka hanoin aban ne’e sira mai hela fali iha sira-nia fatin ka la’e, por-ezemplu ita ba muda vendedór sira iha rotunda ne’eba mais realidade saida mak akontese ita ba duni realidade agora movimentu kuaze la’o la di’ak no iha Fatuhada akontese nafatin”, nia preokupa.
Deputadu ne’e mós fó hanoin ezekutivu prosesu despasu administrativu ne’ebé hala’o presiza kria kondisaun dignu ba povu.
“Dezenvolvimentu ita halo atu benefísiu loloos tenke diretamente ba povu, entaun povu atu sente kona-ba dezenvolvimentu ita tenke halo atendementu dignu ba povu ne’e rasik, por-ezemplu ita hakarak halo eviksaun ita muda ka halo alargamentu estrada ita ba muda sira tenke ba iha fatin ne’ebé dignu”, rekomenda.
Deputadu husi Bankada Opozisaun FRETILIN ne’e hateten se identifika rai ne’e rai Estadu ka privadu ko’alia halo indimizasaun ba afetadu sira kria uluk kondisaun dignu ka fó indimizasaun justu hodi sira kria fali fatin ba sira molok hasai.
“Ida ne la’o uluk tia lai mak ita foin ba halo eviksaun, por-ezemplu ita halo indimizasaun tiha ona mais sira lakohi sai, eviksaun tenke tama ho forsada tama hanesan foin dadaun akontese ne’e ami konkorda, durante ida ne’e laiha, avizu mós tuir luron de’it ho toa avizu dehan imi tenke sai ona pois liu loron ida ka rua sira tama hasai kedas, ida ne’e tratamentu dezumañu ba ita-nia povu ne’e ami kontra”, preokupa.
Nune’e nia sujere atu hadi’a prosesu no kria diálogu ho komunidade afetadu ba prosesu despeju sira tuir mai.
“Ezemplu hanesan iha Kuluhun, ita loke ba liman karuk metru tolu no ba liman loos metru tolu komunidade kolabora sira laiha obsesaun ba ida ne’e, sira entrega ba Governu mak sobu no sira nain rasik mós sobu sira nian, depois derepente de’it Governu hanoin ba halo luan tan ba metru neen, entaun kona ona uma privadu no rai privadu sira ne’e kona ona tanba ne’e maka povu reziste”, nia dehan.
Deputadu ne’e la ko’alia kona-ba indimnizasaun justu ka-la’e ba komunidade afetadu alargamentu estrada iha Kuluhun to’o Bekora maibé presiza hadi’a mekanizmu ne’e.
Deputadu membru Komisaun ne’e sei aprezenta hanoin iha Komisaun hodi tau iha planu ajenda hodi hala’o fiskalizasaun tun direta iha terenu ba haree prosesu rona mós hanoin sira komunidade.
Prezidente Komisaun E, Marcos Xavier, seidauk ko’alia asuntu ne’e tanba komisaun tau ona ajenda sei halo mós fiskalizasaun ba kestaun ne’e hafoin mak bele ko’alia.
Notísia relevante: Governu apoia komunidade afetada ba despeju administrativu iha Bebonuk fila bá munisípiu
Jornalista : Nelson de Sousa
Editora : Rita Almeida
