DILI, 06 Maiu 2025 (TATOLI) – Fundu Petrolíferu Timor-Leste nian iha trimestre dahuluk 2025 hamutuk billaun 18,25, informa relatóriu husi Banku Sentrál Timor-Leste (BCTL, sigla portugés).
“Ita-nia kapitál ka balansu Fundu Mina-rai to’o iha trimestre dahuluk nian hahú husi 01 Janeiru to’o 31 Marsu 2025 hamutuk billaun $18,25. Ida-ne’e tun uitoan kompara ho billaun $18,27 iha trimestre da-haat 2024 nian”, Governadór BCTL, Helder Lopes, hateten iha Akait, Dili, ohin.
Nia esplika katak Fundu Petrolíferu ne’e nia reseita ne’ebé tama mai husi fonte rua mak mai husi fa’an mina no gás no retornu investimentu.
“Durante períodu trimestre dahuluk osan ne’ebé ita hetan mai husi fa’an mina no gás, ita bolu reseita petrolíferu hamutuk tokon $6,2 no osan ne’ebé ita hetan husi rendimentu brutu ka retormu husi investimentu Fundu Mina-rai iha merkadu finanseiru hamutuk tokon $226,65”, informa.
Retornu ne’ebé kontribui husi fonte fundamentál tolu ne’ebé kompostu husi kupaun/funan no dividendu neʼebé simu hamutuk tokon $133,71 no mudansa iha valór merkadu nian hamutuk tokon $92,94, nune’e rendimentu ba karteira Fundu Mina-rai husi merkadu finanseiru maka 1,19%, kompara ho nia sasukat (benchmark) 0,96%.
Nia adianta katak iha períodu ne’e, osan ne’ebé sai husi Fundu Mina-rai iha buat rua mak Governu dada hodi finansia depeza Estadu no dada osan montante kiikoan hodi selu ema sira ne’ebé ajuda “ita halo jestaun investimentu Fundu Mina-rai”.
Totál osan ne’ebé sai husi Fundu Mina-rai, iha trimestre ne’e, hamutuk tokon $254,03, ne’ebé husi totál ne’e tokon $250 dada iha Fevereiru 2025 no transfere ba konta tezouru Ministériu Finansa nian atu finansia orsamentu Estadu no restu tokon $4,03 hodi selu kustu jestaun investimentu ka jestór sira ne’ebé ajuda investe iha Fundu ne’e.
Dezde estabelesimentu Fundu Petrolíferu to’o iha trimestre dahuluk 2025 nian totál reseita ne’ebé Fundu hetan husi fa’an mina no gás besik billaun $25,25.
“Totál retornu ne’ebé ita hetan husi investimentu Fundu Mina-rai iha merkadu finanseiru hamutuk billiaun $10,48. Ida-ne’e kuandu ita tau iha média retornu investimentu kada anuál baku ba 4,41%. No totál orsamentu ne’ebé sai husi ita-nia Fundu Mina-rai hodi finansia ita-nia despeza Estadu ka finansia Orsamentu Jerál Estadu hamutuk billiaun $17,66”, nia relata.
Notísia relevante: Fundu Mina-rai Timor-Leste nian iha trimestre ikus billaun $18,27
Jornalista: Arminda Fonseca
Editora: Maria Auxiliadora