DILI, 06 Maiu 2025 (TATOLI)-Ministériu Edukasaun iha ona data serteza atu realiza ezame ba kandidatu profesór rihun 11-resin iha territóriu.
“Tuir informasaun ne’ebé ministériu iha katak loron 19 Maiu hahú ezame ona, nune’e husu ba kandidatu profesór sira atu prepara-an no tenke estuda, matéria ezame sei la-sees hosi matéria ne’ebé ita-boot sira hanorin loron-loron ba ita-nia estudante sira”, Sekretáriu Estadu Sekundáriu no Tékniku Vokasionál, Domingos Lopes Lemos, hatete iha nia knaar fatin Vila Verde, tersa-ne’e.
Nia dehan teste ne’e rigorizu tebes tanba Ministériu Edukasaun hakarak profesór ne’ebé kualidade foin mak bele koloka ba eskola sira hodi hanorin estudante.
“Espresa profesór sira tuir ezame ho di’ak no rezultadu mós di’ak”, nia dehan.
Kandidatu profesór rihun 14-resin mak hatama maibé iha balun ne’ebé la admitidu, entaun hela rihun 11-resin. La admitidu tanba la prenxe rekezitu liuliu diploma la’ós lisensiatura.
Nia hatutan: “Grupu rekrutamentu portugés no e temas de literatura e cultura, ita hetan aplikante 1.242 ne’ebe kompete ba lugares hamutuk 250. Tetun, iha 265 maka aplika no kompete ba lugár 125. Inglés iha 1.145 aplikante no kompete ba 125 lugár. Melaiu hetan 85 aplikante no kompete ba lugares 75”.
Ba grupu istória, jeografia no sidadania no dezenvolvimentu sosiál iha 1.521 hodi kompete ba vaga 150. Ekonomia no m’etodu kuantitativu, sosiolojia no empreendedorizmu rejista 2823 aplikante no kompete ba vaga 100. Aplikante ba matemátika ema-822 hodi kompete ba vaga 100.
Grupu fizika no kímika rejistu aplikante 1102 ne’ebé compete ba fatin 125. Biolojia no jeolojia rejista aplikante 2460 ne’ebé kompete ba vaga 100. Teknolojia no multimedia no informátika hetan 1110 ne’ebé kompete ba 125 lugár, edukasaun fizika no desportu hetan de’it 47 aplikante ba vaga 100. Relijiau no morál aplikante 210 kompete ba vaga 75.
Notísia relevante: ME rejistu ona kandidatura ba vaga sekundáriu hamutuk 16.437
Jornalista : Osória Marques
Editora : Rita Almeida
