DILI, 06 Maiu 2025 (TATOLI) – Kardeál eleitór 133 iha ona Vatikanu hodi partisipa iha Konklave atu hili Papa foun, ne’ebé sei hala’o iha loron 07 Maiu, tuku 10h00 oras Roma (tuku 17h00 otl).
Konklave ne’e inisia ho misa solene ba eleisaun Papa, ne’ebé sei partisipa husi Koléjiu Kardeál atu husu orientasaun espíritu santu iha eskolla Papa foun.
Haktuir husi Antara News, Kardeál eleitór sira sai husi Kapela Paulina bá Kapela Sistina no husu sira atu tau liman iha Sagrada Eskritura no halo juramentu ba sijilu iha eleisaun ba Papa.
Depoizde Kardeál hotu tama iha sala, Mestre Selebrasaun Litúrjika Pontifísia sei temi ‘Extra Omnes!’ no tuirmai odamatan kapela nian xave metin.
‘Extra Omnes’ mak fraze iha lian Latina ne’ebé signifika “ema hotu sai bá li’ur” ka “ema hotu iha li’ur”. Ne’e mak orden ida ne’ebé fó husi Mestre Selebrasaun Litúrjika Pontifísia atu marka inísiu Konklave papál, bainhira Kardeál sira iha ona Kapela Sistina ne’ebé taka metin atu hili Papa foun.
Eleisaun ne’e presiza dois terços atu prienxe rekizitu hili Papa foun.
Bainhira sai suar xaminé nian metan hatudu katak seidauk iha Papa foun mak eleitu no mutin hatudu pelu menus Kardeál 89 mak konkorda ona kona-ba sé mak sei lidera Igreja Katólika no Papa foun sei mosu iha balkaun Bazílika São Pedro nian.
Kardeál eleitór 133 iha ona Vatikanu no sira sei hela iha Casa Santa Marta, ne’ebé serve hanesan rezidénsia ba Kardeál durante Konklave, no iha antiga Santa Marta hanesan parke halimar ba funsionáriu Vatikanu sira-nia oan, ne’ebé lokaliza besik.
Durante Konklave Vatikanu fó sai katak sinál telekomunikasaun movel iha territóriu Estadu Sidade Vatikanu sei dezliga.
Dezligasaun ba sinál telemovel hahú husi tuku 15h00 oras lokál Vatikanu nian [tuku 22h00 otl] iha loron 07 Maiu, eskluindu iha área Kastelu Gandolfu.
“Sinál sei restabelese depois anúnsiu eleisaun Sumu Pontífise”, haktuir deklarasaun husi Vatikanu.
Notísia relevante: Sinál telekomunikasaun iha sidade Vatikanu sei dezliga durante Konklave hodi hili Papa foun
TATOLI
