DILI, 06 Maiu 2025 (TATOLI) – Konklave ba hili Papa foun sei hala’o iha loron 07 Maiu no Vatikanu fó sai katak sinál telekomunikasaun movel iha territóriu Estadu Sidade Vatikanu sei dezliga.
Dezligasaun ba sinál telemovel hahú husi tuku 15h00 oras lokál Vatikanu nian [tuku 22h00 otl] iha loron 07 Maiu, eskluindu iha área Kastelu Gandolfu.
“Sinál sei restabelese depois anúnsiu eleisaun Sumu Pontífise”, haktuir deklarasaun husi Vatikanu.
Serbisu ba preparasaun Kapela Sistina no akomodasaun iha uma rua Casa Santa Marta pratikamente konklui ona, no Kardeál sira bele halo check-in hahú tersa-feira dadeer.
Kardeál sira bele dezloka husi Casa Santa Marta to’o Kapela Sistina konforme hakarak, inklui la’o ain, más ho perkursu protejidu.
Hela loron rua hahú Konklave, Kardeál sira reúne iha segunda-feira ne’e halo Kongresaun Jerál rua, ida iha dadersán no seluk iha lokraik. Kardeál eleitór 133 daudaun iha hotu ona Roma.
Iha enkontru rua ne’e aborda tema oioin hanesan migrasaun, funu, sinodalidade, ekleziolojia komuñaun, seita no kompromisu no responsabilidade Kardeál sira-nian atu apoia Papa foun, papél feto, Karitas, diteitu kanóniku no papél Estadu Sidade Vatikanu nian.
Iha lokraik ne’e, iha Kapala Paulina, realiza mós serimónia juramentu pose ba funsionáriu no asistente Konklave tantu ekleziástiku kuantu leigu besik atus.
Lembra katak kadeira líder Igreja Katólika daudaun ne’e mamuk depoizde Papa Francisco hakotu iis iha loron 21 Abríl. Mate-isin Papa nian haloot ona iha Bazílika Santa Maria Maiór iha Roma, iha loron 26 Abríl.
Tuir tradisaun, Vatikanu halo períodu lutu durante loron sia depoizde Papa mate. Liu ida-ne’e, realiza prosesu Konklave hodi hili Papa foun ne’ebé hala’o ho prosesu ne’ebé segredu.
Notísia relevante: Konklave: Vatikanu hahú instala xaminé iha topu Kapela Sistina
Jornalista: Jesuína Xavier
Editora: Maria Auxiliadora
