BOBONARU, 06 Maiu 2025 (TATOLI)—Ministériu Ensinu Superiór Siensia no Kultura (MSSK) liuhusi diresaun nasionál legalizasaun, tersa ne’e, halo diseminasaun kompeténsia ba autoridade munisípiu Bobonaru no dirijente eskola sira kona-bá rekezitu legalizasaun diploma, lisensa abertura kursu foun no lisensa estabelesementu Institutisaun Ensinu Superiór (INS) foun.
“Ami realiza atividade ne’e tanba uluk iha VIII Governu ami halo tiha ona diseminasaun kona-ba estabelesimentu Universidade foun, maibé realidade ikus-fali mai institutisaun sira-ne’ebé hatama proposta sei nafatin balun la kompre kritériu sira-ne’ebé ami fó sai. Tanba ne’e, ami tenke halo diseminasaun ba kritériu 10, sub-kritériu 52 inklui kritériu legalizasaun diploma atu nune’e sira ba hatama pedidu karik labele sala ona,” Xefe Departimentu Diresaun Nasional Legalizasaun MSSK, Imelita Maria Perreira, informa ba Jornalista sira iha salaun Maria-Tapo.
Reprezentante diretór Servisu Munisipál Edukasaun Autoridade Munisípiu Bobonaru, Manuel Gonçalves, konsidera programma ne’e importante tebes tanba entidade hotu presiza tebes atu hatene kritéria kona-bá estabelesimentu Ensinu Superiór foun.
“Ha’u agradese ba MSSK ne’e iha hanoin hodi disemina estabelesimentu Ensinu Superiór iha nivél nasionál no munisípiu. Ida-ne’e presiza no tenke hatuur kritéria ida-ne’ebé rigorozu, nune’e ita labele estabelese Ensinu Superiór por ita-nia hakarak. Tanba, ikus-ikus ne’e grupu ida tuur hamutuk ka proemete prontu loke eskola. Lahatene kritériu, ikus mai Universidade ne’e taka ita nia-oan sira mak sai vítima,” nia dehan.
Nia haklaken, presiza halo duni diseminasaun atu nune’e ema hotu-hotu bele intende didi’ak ninia rekezitu sira.
“Ita hatene atu hetan diploma Ensinu Superiór ne’e la’ós iha Timor de’it, iha rai-li’ur mós barak. Ita-nia preokupasaun mak ne’e, sira balun ne’ebé dehan ba eskola, ba iha ne’ebá keta la eskola karik, depois fila mai iha diploma no depois legaliza. Ne’ebé, ha’u hatene katak iha MESSK iha ona dadus, bele ita finaliza ona ita-nia Estudu lisensiatura iha rai-li’ur maibé sira-nia lista iha Ministériu mós iha, ne’ebé defisíl mosu diploma ida la legál ne’e,” nia dehan.
Sekretáriu Autoridade Munisípiu Bobonaru ba asuntu Finansa, Domingos da Costa, hato’o agradesementu ba MSSK no husu ba partisipante sira atu rona no hatutan ba komunidade liuliu estudante sira hotu tanba prosesu legalizasaun diploma naruk.
“Ninia prosesu ne’e la fasíl ida. Diploma ne’e ita fó ba iha ne’ebá, sei hatama iha sistema lai, mai husi Universidade. Ne’ebé, se nia mai husi Indonézia entaun tenke kontaktu fali ba iha ne’ebá haree ema-ne’e ramata duni iha eskola ne’e ka lae, ne’e mak prosesu ne’e to’o semana ne’e, atu evita diploma ilegál ne’e. Maibé ho ida-ne’e fasíl ba ita atu lori dokumentu ne’ebé ita presiza atu ba hatama,” nia dehan.
Sekretáriu Autoridade Munisípiu Bobonaru ne’e rekomenda ba MSSK atu destaka funsionáriu ida (1) iha Munisípiu hodi halo atendementu ba legalizasaun diploma.
“Ita husi ne’e tenke ba legaliza iha Dili, prosesu kle’ur ne’e ita presiza urjente ne’e araska,” nia hatetem.
Kona-bá Estabelesimentu Ensinu Superiór foun, nia argumenta, presiza duni disemina kritéria, tanba antes ne’e Universidade balun loke tiha iha Munisípiu Bobonaru taka fali no agora hela de’it ona Institutu Off Busines (IOB).
Domingos hatutan, estabelesimentu INS foun ne’e importante tebes tanba agora estudante barak mak hakarak kontinua estudu iha munisípiu.
“Agora iha IOB Maliana la sala semestre ida $10 hanesan ne’e, ita la gasta barak. Se ita iha Dili selu kós $50 depois seluk tan bara-barak ne’e, hanesan de’it, Tanba, aban bainrua graduasaun iha diploma ne’e la hakarak universitáriu ne’e mai husi munisípiu, se IOB karik nia hakarak hanesan de’it,” nia dehan.
Enkuantu, tuir dadus husi MESSK daudaun ne’e Institutisaun Ensinu Superiór ne’ebé estabelese iha Timor-Leste hamutuk 19 ne’ebé kompostu husi Universidade Públiku ida (1), privada tolu (3) no Institutu 15.
Notisia Relevante: MESSK aseita pedidu PNTL estabelese ISSPol no Akademia Polísia
Jornalista : Sergio da Cruz
Editór : Cancio Ximenes
