DILI, 06 Maiu 2025 (TATOLI)-Ministériu Solidariedade Sosiál no Inkluzaun (MSSI) sosa ona ai-balun boot (kaixaun) 417 konta ba osan $16.240 iha trimester dahuluk hodi apoiu ba família matebian iha nasionál no munisipál.
Diretór Jerál MSSI, Florensio Pina, hateten kaisaun ne’e MSSI apoiu maioria liu iha nasionál hafoin ba iha munisípiu sira.
“Hahú Janeiru to’o Marsu ita atende kaixaun 417, kalkula ba osan gastu ona $16.240, ita-nia maluk sira ne’ebé mate no maiória husi nasionál”, dehan Diretór Jerál MSSI, Florencio Pina, ba jornalista TATOLI iha nia knaar fatin, Kaikoli, tersa-ne’e.
Atendimentu halo mós sira ne’ebé mate iha uma, la’ós ospitál de’it. Apoiu komplementár seluk mak karreta funeráriu hodi transporta mate-isin ba moris fatin.
“Informasaun hotu-hotu ne’ebé ligadu ho ita-nia maluk sira ne’ebé mate, MSSI kontinua organiza apoiu”, nia katak.
MSSI prevee $26,188.602 iha Orsamentu Jerál Estadu (OJE) 2025 hodi kontinua fó prioridade ba programa serbisu no atendimentu sosiál ba povu.
Hosi osan ne’e aloka ba saláriu vensimentu $3,982,088, beins no serbisu $10,744,951, transferénsia públika $9,501,672, kapitál menór rihun $500 no kapitál dezenvolvimentu $1,459,891.
MSSI iha programa prioridade rua mak dezenvolvimentu instituisionál no serbisu atendimentu sosiál.
Notísia relevante: MSSI Tau Millaun Rua Apoiu Instituisaun Solidariedade Sosiál
Jornalista : Osória Marques
Editora : Rita Almeida
