DILI, 06 Maiu 2025 (TATOLI) – Governu publika ona dekretu kona-ba regra sira ne’ebé aplikavel ba serimónia hasa’e no hatún bandeira nasionál durante serimónia ofisiál sira ne’ebé komemora Proklamasaun Independénsia Nasionál, 28 Novembru, no Restaurasaun Independénsia, 20 Maiu.
Diploma ne’e define mós kritériu sira ba konstituisaun, selesaun no funsionamentu Korpu Hasa’e Bandeira Nasionál (CIBN, sigla portugés), estrutura ne’ebé responsavel ba ezekusaun téknika no simbóliku hosi aktu solene sira-ne’e.
“Bandeira nasionál hanesan símbolu prinsipál ida husi soberania no identidade Timor-Leste nian, ne’ebé reprezenta luta, valór no aspirasaun sira povu timoroan nian. Ninia hasa’e no tun iha serimónia ofisiál sira nu’udar momentu ida ne’ebé simbóliku tebes no hanesan afirmasaun ba unidade nasionál”, afirma nota husi Governu.
Dekretu Governu ida-ne’e estabelese prosedimentu ofisiál ne’ebé tenke tuir no define kritériu ba kompozisaun Korpu Hasae Bandeira Nasionál, ne’ebé kompostu husi estudante ensinu sekundáriu sira, ne’ebé hili tuir parámetru espesífiku hanesan idade, kondisaun fízika no dixiplina, no komanda husi Kapitaun Forsa Armada (F-FDTL) ida.
“Diploma ne’e mós estipula kondisaun sira partisipasaun nian, farda obrigatóriu no insentivu sira ne’ebé fó ba membru CIBN sira, inklui kompensasaun monetária no sertifikadu partisipasaun nian”, dehan.
Serimónia ne’e inklui momentu sira ho solenidade boot, hanesan entrada Bandeira Nasionál, ne’ebé lori hosi CIBN, halo desfile ba fatin hasae bandeira nian. Desfile ne’e hahú ho batallaun ida husi F-FDTL, depois mai bandeira, no tuir fali mai batallaun ida uosi Polísia Nasionál Timor-Leste (PNTL).
Bandeira nasionál hasae no hatún ho solenidade no sinkroniza ho múzika inu nasionál husi CIBN no ema hotu ne’ebé marka prezensa tenke hamriik nu’udar sinál respeitu, ho membru militár F-FDTL no polísia PNTL sira fó kontinénsia.
Dekretu ne’e regula mós realizasaun ba serimónia sira-ne’e iha instituisaun públika sira no fora husi kapitál, prevee adaptasaun ba selebrasaun sira ne’ebé hala’o iha Rejiaun Administrativa Espesiál Oekusi Ambenu nian, iha munisípiu sira no iha Ataúru.
Iha dekretu ne’e hateten serimónia hasa’e bandeira nasionál iha Palásiu Governu, ministériu sira, sekretaria Estadu sira, estabelesimentu ensinu no instituisaun sira seluk Estadu nian sei la hala’o iha loron segunda dahuluk fulan-Maiu no Novembru nian, maibé iha loron 20 no 28.
“Funsionáriu públiku sira tenke tuir serimónia hasa’e bandeira nasionál nu’udar parte ida husi serimónia ofisiál sira ne’ebé komemora Proklamasaun no Restaurasaun Independénsia Nasionál”, konklui.
Notísia relevante: Aprova norma sira ba serimónia hasa’e no hatún bandeira nasionál
TATOLI
