DILI, 06 Maiu 2025 (TATOLI) – Primeiru-Ministru (PM), Xanana Gusmão, simu vizita kortejia ida husi Embaixadór Reinu Kamboja iha Timor-Leste, Chun Sovannarith, hodi ko’alia kona-ba kooperasaun entre nasaun rua ne’e nian.
Diskusaun entre parte rua ne’e toka liubá ASEAN, pás no estabilidade rejionál, liuliu foka ba adezaun tomak Timor-Leste iha ASEAN iha tinan ida-ne’e.
Aleinde ne’e, diskute mós kona-ba kooperasaun entre Kamboja no Timor-Leste iha área ekonómia, komérsiu, edukasaun, turizmu, agrikultura, telekomunikasaun, no seluk tan.
Embaixadór Reinu Kamboja iha Timor-Leste, Chun Sovannarith, relata katak nia nu’udar Embaixadór Reinu Kamboja nian dahuluk iha Timor-Leste ho rezidénsia iha Dili no foin halo vizita kortezia ba Primeiru-Ministru Xanana Gusmão.
“Ami hein atu serbisu besik liután ho Estadu membru ASEAN sira, nune’e bele ajuda Timor-Leste sai membru plenu ba ASEAN iha tinan ida-ne’e. Ami dezeja susesu di’ak, ami dezeja mehi ida ba susesu Timor-Leste atu adere ba ASEAN”, nia dehan iha Palásiu Governu, ohin.
Aleinde ne’e, sira mós fahe sira-nia hanoin kona-ba lisaun sira iha pasadu, hakarak dehan istória entre Kamboja no Timor-Leste kona-ba buka dame, rekonsiliasaun no unidade nasaun nian ba dezenvolvimentu sosioekonómiku.
“Ha’u hodi Embaixada Reinu Kamboja nia naran iha ne’e hato’o ami-nia agradesimentu ba Primeiru-Ministru Xanana Gusmão, tanba ohin permite ha’u atu mai halo vizita kortezia ba nia. La’ós de’it xamada kortezia de’it, maibé diskusaun kona-ba ita-nia relasaun bilaterál, ita-nia lasu amizade, kooperasaun ne’ebé eziste daudaun entre ita-nia nasaun rua”, dehan.
Iha enkontru ne’e mós relata kona-ba serbisu balu ne’ebé sira mós halo hamutuk ho Ministériu Negósiu Estranjeiru no Kooperasaun (MNEK) no ekipa husi Palásiu Prezidensiál ba arranju susesu sira husi vizita ofisiál ne’ebé sei mai husi Prezidente Senadu Kamboja, Samdech Akka Moha Sena Padei Techo Hun Sen, nu’udar aman dame nian ka mestre dame nian ba povu Kamboja.
Vizita ne’e rasik sei hahú iha loron 07 to’o 09 Maiu. Nia to’o aban iha tuku 17h00 no hafoin vizita sei filafali iha loron 09 iha tuku 14h00.
Notísia relevante: Embaixadór Kamboja Chun Sovannarith entrega karta kredensiál ba Xefe Estadu
Jornalista: Arminda Fonseca
Editora: Maria Auxiliadora
