DILI, 07 Maiu 2025 (TATOLI)—Krúz Vermella Timor-Leste (CVTL-sigla portugés) hamutuk ho Banco de Sangue, tersa ne’e, realiza atividade doasaun raan atu ajuda pasiente sira-ne’ebé presiza raan iha ospitál, nu’udár jestu komemora Loron Mundiál Krúz Vermella Internasionál.
“Relasiona ho atividade ohin ne’e atu komemora Loron Mundiál Krúz Vermella Internasionál ne’ebé mak monu iha loron 8 Maiu. Entaun, husi atividadae sira-ne’ebé mak ita halo ne’e ita servisu hamutuk ho Banco de Sangue HNGV hodi halo atividade doasaun raan ne’ebé envolve husi estudante sira husi Universidade da Paz (UNPZ) no estudante SOLS, nune’e ita fó ajuda bá ita-nia maluk sira-ne’ebé presiza raan iha ospitál,” Sekretariu Jerál CVTL, Luís Pedro Pinto, ba jornalista sira iha edifísiu CVTL, Bairru Formosa.
Nia hateten, CVTL realiza atividade doasaun raan hanesan parte importante husi kampaña solidariedade no ajuda umanitária, espesialmente ba sira-ne’ebé presiza raan urjente hanesan ema moras, inan isin-rua no labarik sira, tanba doasaun ida bele salva vida.
“Ami mós halo parseiru di’ak ho instituisaun privada, universidade, embaixada sira no sira seluk ne’ebé mak durante ne’e fornese sira-nia raan mai ami,” nia relata.
Nia hatutan, atividade aban (08/5) ne’e CVTL planu ona oinsá atu mobiliza voluntáriu sira para bele hala’o asaun umanitária nian no atividade doasaun raan.
Iha fatin hanesan, Koordenadór Doasaun Raan husi Banco de Sangue, Arsénio Afonso, hateten Banco de Sange parseiru di’ak ho CVTL, ne’ebé organiza atividade doasaun raan, ne’ebé maihusi estudante UNPAZ, UNTL no mós estudante husi AHHA Education/SOLS.
Nia haktuir, funsaun husi Banco de Sangue atu apoiu tékniku hasai raan no raan sira-ne’e Banco de Sangue rekolla hodi analiza, depois raan ne’ebé la infetadu ba moras bele fó bá pasiente sira ne’ebé presiza.
Jornalista: Felicidade Ximenes
Editór: Xisto Freitas da Piedade
