DILI, 07 Maiu 2025 (TATOLI) – Diresaun Nasionál Transporte Terresre (DNTT) rekolla reseita millaun $1,5 iha trimestre dahuluk, informa Xefe Departamentu Sekretariadu Apoiu Tékniku Administrasaun DNTT, Nélson Sequeira Martins.
Reseita sira ne’e mai husi atividade rejistu importasaun ba veíkulu, inspesaun ba krreta, xapa matríkula esensiál, transporte públiku no trata karta kondusaun.
“Tinan kotuk ita hetan reseita hamutuk millaun $5,7, maibé ba tinan ida-ne’e ha’u seidauk bele dehan hetan nafatin reseita hanesan ne’e ka la’e, tanba foin trimestre dahuluk”, Nélson Martins dehan ba Tatoli, ohin.
Nia esplika katak reseita millaun ida-resin ne’e mai husi rejistu veíkulu hamutuk $680.818,50, inspesaun ba importasaun veíkulu $87.447, substitui dokumentu livrete $14.700, dokumentu substitui provizoriamente livrete orijinál veíkulu (DSPLOV) $1.300, xapa espesiál $14.700, lisensa trajetu $65.750, karta kondusaun $209.840, inspesaun veíkulu $436.895 no infrasaun $824.
Enkuantu ezekusaun ba trimestre dahuluk nian DNNT foin ezekuta 7,3% husi totál orsamentu alokadu iha 2025 hamutuk millaun 2,798.507.
Lembra katak, iha 2024, DNTT mós halo akizisaun ba xapa matríkula orijinál ba karreta no motór hamutuk rihun 10 ho totál orsamentu rihun $110 ne’ebé sosa husi empreza xineza Auto Zone.
Xapa matríkula orijinál ne’ebé DNTT prodús ona ba karreta ki’ik husi B.21-636 TLS, karreta boot A.55-605 TL no motór to’o ona X-1089 TL.
Notísia relevante: DNTT arrekada reseita millaun $5,7 iha 2024
Jornalista: Arminda Fonseca
Editora: Maria Auxiliadora
