DILI, 07 Maiu 2025 (TATOLI) – Reuniaun Konsellu Ministru, ohin, autoriza Ministériu Obra Públika (MOP) halo despeza ba konstrusaun trosu estrada husi suku Dotik bá postu administrativu Alas, munisípiu Manufahi.
Xefe Planeamentu MOP, Tito Edgar, esplika katak konstrusaun trosu estrada husi Dotik bá Alas, antes ne’e, Governu kontrata ona empreza internasionál China Nuclear Industry 22nd Construction Co, Ltd hodi halo reabilitasaun estrada husi suku Wedaberek, aldeia Meti-Oan, to’o postu administrativu Alas, maibé ida-ne’e labele kontinua, tanba estrada ne’e kondisaun rai la di’ak atu halo konstrusaun.
“Tanba ne’e mak ita muda fali bá suku Dotik bá Alas, tanba kondisaun rai husi Wedaberek bá Alas ne’e la permite atu halo. Bainhira ita halo mós, ita sei la uza tempu naruk tanba bazeia ba rezultadu teste kondisaun rai nian, iha ne’ebá rai [sirtikli] ka rai manu-teen. Entaun labele halo estrada kualidade iha ne’ebá. Karik halo mós, iha futuru nia kustu manutensaun sei boot liu fali konstrusaun nian”, Tito Edgar ba Tatoli via telefone, ohin.
Nia subliña katak konstrusaun trosu estrada husi suku Dotik bá Alas, munisípiu Manufahi ne’ebé ohin autoriza ba MOP halo despeza ba konstrusaun estrada ho naruk hamutuk kilómentru 16,25 no valór orsamentu ne’ebé prevee hamutuk millaun $15,4. Obra ne’e kaer husi empreza China Nuclear Industry 22nd Construction Co, Ltd.
Nia adianta katak konstrusaun ne’e ho duransaun tinan ida-resin, hahú iha 2025 no sei termina iha tinan oin.
Lembra katak reabilitasaun estrada husi suku Wedaberek, aldeia Meti-Oan to’o postu administrativu Alas, munisípiu Manufahi ho naruk kilómetru 23, ne’ebé hatuur ona fatuk dahuluk iha loron 14 Juñu 2024.
Projetu reabilitasaun estrada Wedaberek bá Alas responsabiliza husi empreza internasionál Xina ho totál orsamentu millaun $13,8.
Notísia relevante: MOP tau fatuk dahuluk ba reablitasaun estrada Wedaberec ba Alas
Jornalista: Arminda Fonseca
Editora: Maria Auxiliadora
