DILI, 07 Maiu 2025 (TATOLI) – Kardeál sira halo Kongregasaun Jerál dahikus, iha loron 06 Maiu, antes ba abertura ofisiál Konklave ne’ebé sei inisia ohin.
Kongregasaun Jerál Kardeál sira-nian ba da-12 ne’e konta ho intervesaun 26 ne’ebé ko’alia mós kona-ba dezafiu sira ne’ebé kreda hasoru no perfíl ne’ebé hakarak ba prósimu Papa. Informasaun ne’e fó sai husi, Matteo Bruni, Diretór Gabinete Imprensa Santa Sé nian.
Entre tema sira ne’ebé ko’alia maka kona-ba kontinuidade husi reforma sira Fransisku nian, luta hasoru abuzu sira, ekonomia, renovasaun Kúria nian, sinodalidade, dame no ekolojia.
Papa foun nia misaun nu’udar “Pontifex” konstrutór ponte nian – pastór no oin Igreja Samaritana nian hetan énfaze. Iha mundu ida ne’ebé marka ho funu no polarizasaun, Papa ida mizerikórdia nian, rona nian no esperansa nian maka bolu.
Ko’alia mós kona-ba Direitu Kanóniku, podér pontifikadu, unidade Igreja nian, kardeál sira-nia knaar no sujestaun sira hanesan promosaun hamutuk Loron Mundiál Ema Ki’ak nian. Propoin mós atu Konsistória sira hala’o beibeik liután.
Reflesaun sira seluk inklui inisiasaun sarani nu’udar aktu misionáriu, mártir sira fiar nian iha área sira persegisaun nian, krize klimátika no data Páskua nian, ho referénsia ba Konsíliu Niceia nian no ekumenizmu.
Bruni relata katak apelu ida husi Kardeál sira ba fin husi konflitu armadu sira no ba negosiasaun sira dame nian lee no publika ona. Sesaun ne’e taka iha tuku 12h30 oras lokál. Sei laiha Kongregasaun seluk molok Konklave.
Kongregasaun Jerál dahikus ne’e partisipa husi membru Koléjiu Kardinalísiu 173 no eleitór 130.
Detallu sira kona-ba Oráriu Konklave nian
Diretór Gabinete Imprensa ne’e mós esklarese aspetu prátiku sira kona-ba programasaun litúrjika no prosesuál Konklave nian, ne’ebé sei hahú iha lorokraik kuarta-feira, loron 07 fulan-Maiu.
Iha dadeer, sei selebra misa “Pontífsiu pro elijendu”, iha tuku 10 dadeer oras lokál (tuku 17h00 otl) iha Bazílika São Pedro. Iha tuku 15:45 oras lokál (22h45 otl), Kardeál sira sei sai husi Casa Santa Marta bá Palásiu Apostóliku hodi hahú Konklave.
Iha loron-kinta, Kardeál sira sei sai husi Santa Marta iha tuku 7h45 dadeer (14h45 otl). Iha tuku 8h15 dadeer (15h15 otl), sei selebra Misa no Laudes iha Kapela Paulina. Iha tuku 9h15 dadeer (16h15), sei iha Orasaun Meiudia (Terça) iha Kapela Sistina no sei hahú votasaun.
Bruni indika katak se suar ne’e mutin, bele haree husi tuku 10h30 dadeer oras lokál (17h30 otl) ka hafoin meiudia. Almosu sei serve iha Casa Santa Marta iha tuku 12h30 (19h30 otl), ho filafali bá Sistina iha tuku 3h45 lokraik (22h45 otl). Votasaun loraik sei hahú fali iha tuku 4h30 lokraik (11h30 otl).
Karik iha suar mutin durante loraik, iha posibilidade katak sei mosu maizumenus tuku 5h30 lokraik (12h30 otl); se la’e suar metan bele haree maizumenus tuku 7 kalan (02h00 madrugada otl). Atividade sira loron nian sei konklui ho Véspera sira iha Kapela Sistina, no iha tuku 19h30 oras lokál (02h30 madrugada otl) Kardeál sira sei filafali bá Casa Santa Marta.
Notísia relevante: Funsionáriu no asistente sira halo juramentu antes Konklave
Jornalista: Hortencio Sanchez
Editora: Maria Auxiliadora
