DILI, 07 Maiu 2025 (TATOLI)—Komandu FALINTIL-Forsa Defeza Timor-Leste (F-FDTL), presta omenajen ikus ba Saudozu Ernesto Fernandes “Dudu” ne’ebé hakotu iis iha Hospital Nacional Guido Valadares (HNGV), Bidau, Dili, kuarta dadeer ne’e tuku 05.25 Otl.
Molok família lori saudozu bá nia moris fatin, Ermera, sei liuhusi Kuartél Komandu F-FDTL hodi hetan presta omenajen husi Instituisaun F-FDTL tanba saudozu mós nu’udár veteranu ba luta libertasaun nasionál.
Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek”, haktuir Komandante Ernesto “Dudu” hanesan asua’in no pratriota ne’ebé lahatene kolen.
“Nia (Ernesto Dudu) hanesan asua’in ida, patriota ida, kombatente ida no lutadór inkansável ida-ne’ebé hola inisiativa dada funu luta armada mai iha Rejiaun Fronteira Norte,” Falur hateten ba jornalista hafoin presta omenajen ba Saudozu Dudu.
Notísia relevante: Adeus!: Komandante Dudu nia istória hakerek hela iha “Rai-hun mutin” no “Rai nakaras”
Jenerál Falur rekorda katak iha 1980 FALINTIL barak abondona ona gerilla hodi hahú sai husi área Dili bá parte súl, parte leste no parte sentru, hodi unifika fali forsa gerilla nune’e kontinua luta ba funu libertasaun nasionál. Maibé, rejiaun ida-ne’e (Fronteira Norte) abandonadu, entaun iha 1981 Dudu hola inisiativa dada fali rejiaun ida-ne’e ne’ebé kobre territóriu laran tomak no ne’e nu’udár asaun eroika ne’ebé nia halo ne’ebé tenke rekoñese ida-ne’e.
“Depoizde luta naruk nia mai servisu ba Estadu harii nasaun no instituisaun. Ha’u hakruuk tebes ba nia desizaun. Iha 2006 kuandu mosu divizionizmu, nia iha klaran. Nia la haliis bá ida. Nia kaer prinsípiu unidade FALINTIL nian. Ida-ne’e mak virtude boot husi asua’in ida-ne’e,” Falur lembra.
Nia husu ba membru F-FDTL kontinua kaer metin memória ka legadu sira-ne’ebé Saudozu Dudu rai hela mak kaer metin prinsípiu unidade nasionál tuir prinsípiu FALINTIL nian.
Jenerál Falur dehan, F-FDTL kontinua dignifika Saudozu Dudu mak ohin fó omenajen ne’e, maibé rekoñesimentu sira seluk lei mak sei rekoñese no polítiku sira mak hatene.
Falur hateten Instituisaun F-FDTL lahaluha família Saudozu Dudu no promete sei haruka saudozu nia oan ida sai membru F-FDTL.
“Ha’u luta hela ba ida-ne’e. Tanba ne’e, husu ba veteranu nia oan sira hakarak tama F-FDTL tenke hasees aan husi arte marsiál no labele komete krime iha li’ur, tanba ne’e kritériu. Se tama arte marsiál no halo krime sei la tama F-FDTL,” nia fó hanoin.
Jornalista: Natalino Costa
Editór: Xisto Freitas da Piedade
