DILI, 07 Maiu 2025 (TATOLI)-Parlamentu Nasionál iha loron 08 Maiu realiza reuniaun plenáriu sesaun solene ba vizita ofisiál Prezidente Senado Reinu Kamboja, Samdech Hun Sen, mai Timor-Leste.
Tuir ajenda husi Parlamentu Nasionál, sesaun solene vizita ofisiál no hala’o mós enkontru bilaterál ho Samdech Akka Moha Sena Padei Techo Hun Sen iha Parlamentu Nasionál.
Serimónia ne’e hahú iha tuku 10:00 dadeer hahú ho enkontru bilateral entre Prezidente Hun Sen ho kompozisaun meza Parlamentu.
Hafoin ne’e Prezidente Parlamentu Nasionál, Maria Fernanda Lay ho Prezidente Hun Sen dirije iha sala plenária.
Sei iha mós intervensaun husi Bankada Parlamentár sira. Hafoin ne’e Prezidente Reinu Kamboja sei dirije mensajen ba Parlamentu.
Enkuantu, Prezidente Kambodia hala’o vizita ofisial mai Timor-Leste hahú ohin 07-09 Maiu 2025.
Prezidente Reinu Kamboja to’o ona Timor-Leste iha aeroportu internasionál Nicolau Lobato, kuarta ne’e, tuku 16:30.
Notísia relevante: Xanana no Embaixadór Kamboja aborda kooperasaun, ASEAN no estabilidade rejionál
Jornalista : Nelson de Sousa
Editora : Rita Almeida
