DILI, 07 Maiu 2025 (TATOLI) – Sinál suar dahuluk ne’ebé hatudu rezultadu votasaun Konklave papál sei sai husi xaminé Kapela Sistina iha kuarta-feira tuku 19h00 kalan oras Vatikanu (tuku 3h00 madrugada otl), informa Diretór Sala Imprensa Santa Sé, Matteo Bruni.
Nia hateten Kardeál eleitór sira sei tama iha kapela pur volta tuku 16h30 ka 23h30 otl, depois kontinua ho katekeze ne’ebé dirije husi Kardeál Reniero Cantalamessa no juramentu Kardeál sira atu mantein sijilu no integridade eleisaun, haktuir husi Antara News ne’ebé Tatoli sita, ohin.
Tuirmai, eleisaun atu hili susesór Papa Francisco, ne’ebé mate iha 21 Abríl ne’e, sei hahú.
Bruni esplika katak eleisaun ne’e bele halo to’o dala-haat kada loron, no sinál suar sei sai de’it dala-rua iha loron ida to’o Papa foun eleitu.
Nune’e, iha kinta-feira (08/05) ka loron daruak Konklave, sinál suar dahuluk bele sai pur volta iha meiu-dia.
Entantu, se Papa foun eleitu iha votasaun dahuluk iha loron ne’e (kinta-feira), maka suar mutin sei sai husi xaminé Kapela Sistina pur volta tuku 10h30 (tuku 17h30 otl).
Sinál suar tuirmai sei la mosu to’o pur volta tuku 19h00 kalan oras lokál, esetu se eleisaun iha loraik eskolla ona Papa foun ne’ebé ho sinál suar mutin sai pur volta tuku 17h30 oras lokál.
Sinál suar ne’e maihusi sédula votasaun rezultadu husi eleisaun Kardeál sira ne’ebé sunu iha fornu Kapela Sistina nian.
Bainhira sunu, sédula votasaun ne’e sei mistura ho substánsia kímika nune’e rezulta suar metan no mutin.
Sinál suar metan hatudu seidauk iha Papa foun mak eleitu, enkuantu suar mutin hatudu iha ona Papa foun ba Igreja Katólika.
Notísia relevante: Kardeál sira partisipa ona iha misa espesiál antes hahú Konklave
TATOLI
