DILI, 08 Maiu 2025 (TATOLI) – Reuniaun Konklave iha Vatikanu, iha kinta-feira dadeer, seidauk iha desizaun konsesuál kona-ba susesór Papa Francisco.
Suar metan husi xaminé Kapela Sistina nian sai pur volta tuku 11h50 oras Roma (18h50 otl), hanesan ho suar ne’ebé sai iha kuarta-feira kalan, iha reuniaun dahuluk Konklave nian.
“Votasaun dadeer remata ona: Kardeál sira seidauk hetan konsesu depois votasaun dala-tolu”, Vatican News fó sai.
Atu iha Papa foun mak tenke hetan 2/3 husi Kardeál sira ka hetan votu 89 husi eleitór 133.
Depois oras balun reuniaun no votasaun, seidauk iha desizaun ba eskolla Papa da-267 mak Konklave sei kontinua iha loraik, ba votasaun dahaat nian: votasaun ida iha loron kuarta-feira, rua iha kinta-feira dadeer no prevista tan rua iha parte loraik.
Votasaun tuirmai sei realiza pur volta tuku 16h30 oras Roma ka 23h30 otl.
Konklave loron daruak iha kinta dadeer ne’e, sarani rihun mak hein iha Prasa São Pedro nian hodi hein suar husi xaminé Kapela Sistina nian, tanba hakarak atu hatene rezultadu votasaun husi Kardeál sira-nian.
Lembra katak eleisaun ba Papa sira antes, iha 2005 no 2013, hala’o durante loron rua, maibé votasaun balun iha sékulu anteriór realiza durante loron lima. No iha eleisaun ida ne’ebé kle’ur liu durante tinan tolu, entre Novembru 1268 no Setembru 1271.
Konklave tinan 2025 mak boot no internasionál liu hotu ne’ebé iha no reúne Kardeál sira husi nasaun kuaze 70.
Notísia relevante: Suar metan sai husi xaminé iha Kapela Sistina
TATOLI
