DILI, 08 Maiu 2025 (TATOLI) – Suar metan sai husi xaminé iha Kapela Sistina, iha loron dahuluk Konklave, ne’ebé signifika seidauk iha Papa foun ne’ebé eleitu.
Suar ne’e sai pur volta tuku 21h00 oras Vatikanu (iha kuarta-feira kalan, 07/05) ka tuku 4 madrugada oras Timor-Leste, iha kinta-feira, 08 Maiu.
“Suar metan hatudu fin husi loron dahuluk Konklave iha tuku 21h, oras depois odamatan Kapela Sistina taka ho palavra ‘Extra omnes’”, haktuir husi imprensa Santa Se.
Ida-ne’e signifika katak Konklave kontinua iha loron kinta-feira dadeer, bainhira Kardeál eleitór sira hasoru malu filafali iha Kapela Sistina pur volta tuku 10h30 oras Roma ka tuku 17h30 otl, atu halo votasaun hodi hili Papa ba da-267.
Iha Vatikanu, kuaze fiél rihun 50 mak hein hela iha Prasa São Pedro hodi haree suar metan sai depois iha eleisaun dahuluk ba Papa foun.
Atu eskolla Papa foun mínimu hetan votu 2/3 ka 89 husi Kardeál eleitór sira.
Ne’e hanesan eleisaun dahuluk atu deside kandidatu líder Igreja Katólika foun. Kardeál hamutuk 133 mak daudaun tuir Konklave atu eskolla susesór maktoban Papa Francisco ne’ebé hakotu iis iha loron 21 Abríl ne’e.
Notísia relevante: Vatikanu: Sinál suar dahuluk husi Konklave mosu iha kuarta kalan
TATOLI
