DILI, 08 Maiu 2025 (TATOLI) – Prezidente autoridade munisípiu (PAM) Dili interinu no hanesan mós no Diretór Jerál Dezentralizasaun Governu Lokál, António Agostu Guterres, iha ámbitu komemorasaun 20 Maiu ne’e, husu ba sidadaun hotu atu hasa’e bandeira iha uma oin no kontribui hala’o limpeza.
“Hanesan kargu interinu PAM Dili, ba komunidade sira iha kapitál hahú loron 10 fulan Maiu ba oin sidadaun hotu-hotu, tantu ki’ik no boot, atu festeza ba loron restaurasaun independénsia 20 Maiu ba da-23, hotu-hotu tenke hasa’e bandeira iha ninia uma oin”, Diretór Jerá ne’e apelu ba jornalista TATOLI iha AMD, Dili, ohin.
Sidadaun hotu-hotu mós tenke kontribui ba limpeza liuliu ba loja sira iha área protokolu hanesan iha Kolmera husu sira-nia disponibilidade hanesan sidadaun kontribui pinta ninia loja, hamoos nia loja oin hodi hatudu ba ema seluk katak, Dili ne’e nabilan, Dili ne’e moos.
“Fo’er sira la presiza hein saneamentu mak atu ba ra’ut maibé sira tenke kontribui rasik oinsá maka tau lixeiru iha sira-nia loja oin nune’e tau foer ne’e, no iha dadersan karreta ra’ut foer bele ba foti”, nia apela.
PAM interinu ne’e hateten, sira mós bele kontribui pinta nia uma no dada bandeira iha ninia loja oin, dada bandeira la’ós kesi ba ai-kiikoan sira-ne’ebé bele tohar bainhira anin huu, maibé hatudu katak dada ona bandeira nasaun tenke respeitu no dada oinsá mak ema hotu bele haree no dada ho responsabilidade.
“Tanba Dili hanesan kapitál nune’e ema hotu iha konsentra iha nasaun nia laran, no husu hotu-hotu nafatin kontribui ba jestaun lixu durante festeza loron nasionál ida-ne’e no mós nafatin kontribui jestaun lixu ho diariamente. Katak, la’ós de’it hein loron boot mak foin kontribui maibé, presiza mós kontribui iha loron baibain”, autoridade ne’e ko’alia.
Aleinde ne’e, PAM interinu Dili no mós Diretór Jerál Dezentralizasaun Governu Lokál, António Agostu Guterres informa katak hahú iha loron 15 fulan-Maiu, Ministériu Administrasaun Estatál (MAE) sei loke abertura ba espozisaun iha Portu Dili ba ámbitu selebrasaun 20 Maiu iha tinan-2025 nian, maibé iha loron determinadu hasa’e bandeira, AMD mós sei hasa’e bandeira iha resintu AMD, Matadoru, Dili.
Notísia relevante:Governu selebra restaurasaun independensia ho espozisaun governu lokál
Jornalista: Alexandra da Costa
Editór: Rafael Ximenes de A. Belo
