DILI, 08 Maiu 2025 (TATOLI)-Ministériu Edukasaun (ME) liuhusi Diresaun Nasionál Ensinu Sekundáriu Jerál halo akizisaun ba ekipamentu eletróniku hanesan komputadór, projetór no desktop ba Eskola Ensinu Sekundáriu Jerál Públiku (ESJP) hamutuk 23 iha territóriu.
“Tinan ne’e halo akizisaun ba komputadór, projetór no desktop 323 hodi fasilita manorin hodi hanorin liuhusi elektróniku ba estudante sira”, Diretór Nasionál Sekundáriu Jerál, Benjamin Fernandes, ba jornalista sira iha nia knaar fatin Vila Verde.
Dirijente ne’e dehan ekipamentu sei monta ba kada saladeaula ida, razaun ministériu edukasaun tau desktop, tanba to’o agora manorin iha saladeaula ida laiha laptop.
“Ha’u fó ezemplu ida katak matéria biolojia liga ba korpu umanu entaun bele uza de’it ona ekipamentu ida-ne’e, la presiza lori estatua hodi esplika kada órgaun iha korpu umanu ne’e”, nia dehan.
Nia hatutan alende fahe komputadór no desktop, ministru edukasaun planu ona atu koordena ho INFORDEPE, nune’e fó formasaun ba prosesu sira.
“Ami planu atu ko’alia ho INFORDEPE atu fó formasaun ba ita-nia profesór sira atu oinsá hanorin estudante uza komputadór”, nia dehan.
Rekezitu atu hetan ekipamentu, nia dehan odamatan no janela eskola tenke iha kondisaun di’ak. “Eskola ne’ebé ami identifika ona ne’e ami fó ona orientasaun tenke kuidadu, labele foin fó aban lakon ne’e labele akontese. Tanba ne’e osan konsensaun eskolár ba periódu ne’e ba eskola ne’ebé identifikadu tenke utiliza hodi hadi’a kondisaun”, nia fó hanoin.
Nia reforsa katak kuandu atu distribui ne’e tenke garante ona nia kondisaun, tanba molok atu distribui ne’e ekipa sei observa uluk, mak kuandu kondisaun ladi’ak mak sei fó ba eskola seluk.
Nia dehan akizasaun ne’e iha ona prosesu aprovizinamentu ne’ebé hein atu sosa no distribui ba tinan ne’e. Osan ba ekipamentu ne’e hamutuk rihun $500
Ensinu Sekundáriu Jerál iha territóriu ne’ebé tama lista Ministériu Edukasaun hamutuk 23 iha territóriu.
Hosi eskola 23 ne’e, munisípiu Aileu mak Ensinu Sekundáriu Jerál Públiku (ESJP) Aileu Malere hetan unidade 12, ho ESJP Laulara simu unidade 10. Munisípiu Ainaru mak ESJP Fernando Lasama hetan unidade 10. Munisípiu Baukau mak ESJP Númeru 1 Baukau hetan unidade 14, ESJP Vila Nova hetan unidade 16, no Ensinu Sekundáriu Jerál Filial, Baguia hetan unidade 10.
Munisípiu Bobonaru mak ESJP Dom Martinho Maliana simu unidade 20. Munisípiu Kovalima mak ESJP Seran Cotes unidade 20, ho ESJP Zumalai iha unidade 10. Munisípiu Dili mak ESJP 4 Setembru iha unidade 22 no ESJP 12 joven iha unidade 22. Munisípiu Ermera mak ESJP NCS Glenu iha unidade 20, ESJP Mau-Cruma iha unidade 0 no ESJP Railaku iha unidade 3.
Munisípiu Likisá mak ESJP No 1 Likisa iha unidade 8. Munisípiu Lautein mak ESJP NCS Lospalos iha unidade 28, ESJP Lere Anan Timur iha unidade 10. Munisípiu Manatutu mak ESJP Kay Rala iha unidade 14. Munisípiu Manufahi mak ESJP 1912 Same iha unidade 16, ESJP Betanu iha unidade 10. Oekusi mak ESJP Palaban iha unidade 16, no Vikeke mak ESJP 4 Setembru Vikeke iha unidade 10 no ESJP Olokasa iha unidade 8.
Diretór Eskola Ensinu Sekundáriu Jerál Públiku, 4 Setembru Balide, Segio Alfredo da Cruz, hatete kontente tanba eskola ne’e bele tama iha lista simu ekipamentu.
“Ami-nia eskola 4 Setembru ne’e mós tama iha lista simu komputadór, projetór no desktop. “Ha’u hanoin ekipamentu ne’e bele fasilita ona ami-nia prosesu aprende loron-loron nian”, nia dehan.
Nia dehan eskola ne’ebé nia lidera seguru no iha seguransa. Nia espera katak planu polítika Ministériu Edukasaun sei kontinua ba oin tanba iha era dijitál ne’e presiza ekipamentu.
Notísia relevante: ME distribui mobiliáriu eskolár unidade 210 ba eskola sira iha Vikeke
Jornalista : Osória Marques
Editora : Rita Almeida
