VIKEKE, 21 Marsu 2025 (TATOLI)—Diretór servisu Edukasaun munisípiu Vikeke, Julio Sakadura, informa Ministériu Edukasaun (ME) distribui mobiliáriu eskolár (meza no kadeira) hamutuk unidade 210 ba munisípiu Vikeke hodi fó apoia ba eskola sira-ne’ebé menus mesa no kadeira.
“Foin lalais ne’e, ita-nia ministériu distribui ona kadeira no meza ba eskola rua, ne’ebé durante ne’e sira preokupa ba kadera no meza. Nune’e, ekipa husi ME lori direta ba eskola Sekundáriu Vessoru-Uatulari no ensinu Báziku Filiál Lasama Luka ne’ebé daudaun ne’e ita-nia estudante sira uza ona hodi partisipa prosesu aprendizajen,” Julio Sakadura hateten ba Agência Tatoli iha postu Vikeke Vila, ohin.
Julio rekoñese, durante ne’e ensinu sekundáriu Vesoru no EBF Luka enfrenta liu ba fasilidade meza no kadeira hodi fasilita estudante sira uza ba prosesu aprendizajen.
“Durante ne’e, ita-nia eskola sira enfrenta ba meza no kadeira maibé ita hato’o agradesimentu ba ministériu tanba responde ona ita-nia preokupasaun sira-ne’e. Maske eskola barak sei menus fasilidade kadeira no meza maibé ministériu sei responde fazeadamente,” nia dehan.
Nia aprezenta, lista eskola sira-ne’ebé falta meza no kadeira hanesan EBC 10 Iraler no eskola sira seluk servisu Edukasaun Vikeke hato’o ona pedidu ba Ministériu Eduksaun hodi hetan apoiu ruma.
“Ita atensaun nafatin EBC 10 Iraler ne’ebé menus kadeira no meza sira-nia lista ami haruka ba ona nasionál. Espera ba oin ministériu bele apoiu tan kadeira ba EBC Iraler,” nia hateten.
Tuir dadus, kadeira no meza ne’ebé ME liuhusi Diresaun Nasional Patrimóniu no Lojístika (DNPL) entrega kadeira no meza unidade 120 ba Eskola Ensinu Sekundáriu Jeral Públika Vessoru ho totál estudante hamutuk 88, enkuantu kadeira no meza unidade 90 ba Eskola Bázika Filiál Fernando Lasama Luka.
Jornalista : Vitorino Lopes da Costa
Editór : Cancio Ximenes
