DILI, 08 Maiu 2025 (TATOLI)-Ministru Ensinu Superiór Siénsia Kultura (MESSK), José Honório da Costa Pereira, husu Prezidente Diretivu Ajénsia Nasionál Avaliasaun Akreditasaun Akadémika (ANAAA) atu halo avaliasaun ba kursu sira iha Institutu Ensinu Superiór (IES) ho rigór.
“Avaliasaun tenke tuir lei no kontinua kumpre péritu internasionál hodi mai kontinua halo avaliasaun ba kursu nune’e bele aposta ba kualidade”, MESSK hatete ba TATOLI iha nia fatin Kolmera, kinta ne’e.
Nia dehan: “Ha’u iha konfiansa ba prezidente diretivu foun ANAAA no direitór ezekutivu ANAAA, serbisu hamutuk hodi lori ANAAA ba futuru ne’ebé di’ak”.
Prezidente Konsellu Diretivu Ajénsia Nasionál Avaliasaun Akreditasaun Akadémika, Xisto Martins, hateten nafatin kontinua servisu ne’ebé mak prezidente sesante halo ona oinsá mak bele eleva kualidade edukasaun liuhusi intervensaun ANAAA nian hodi hadi’a.
“Atu haree nia kualidade, ita presiza estabelese padraun, padraun iha ona espera universidade hotu liu-liu parseiru MESSK nian ne’ebé mak halo ona bele halo tuir, nune’e prenxe kritériu sira ne’ebé ANAAA hamutuk ho MESSK halo”, nia informa.
Nia dehan sei hamutuk ho konsellu ezekutivu no mós ho parseiru implementador liu-liu instituisaun nível superiór sira.
“Ita presiza halo parseria no presiza intende malu, presiza hatene ida-idak nia servisu liu-liu tenta hatene di’ak konaba sistema edukasaun hodi garante kualidade asuransi liuhusi nia prosesu aprendizajen iha nivel ensinu superiór, nomos presiza halo servisu hamutuk no kolaborasaun di’ak entre parte internál no esternál, internál hamutuk ho universidade publiku no privadu”, nia dehan.
Instituisaun Ensinu Superiór (IES) hamutuk 19 maibe instituisaun 18 hetan ona akreditasaun, neʼebé seidauk akredita mak Instituisaun Universidade Naroman Esperança (IUNE) Lauala, munisípiu Ermera nian tanba foin hetan lisensa operasionál.
Notísia relevante:Tinan ne’e ANAAA akredita programa 22 no instituisaun rua
Jornalista : Osória Marques
Editora : Rita Almeida
