DILI, 08 Maiu 2025 (TATOLI) – Ministériu Obra Públika (MOP) kontrata ona empreza Arquiris Unipessoal, Lda. atu halo konstrusaun ba ponte Kuluhun iha tempu badak.
Ministru Obra Públika, Samuel Marçal, hateten ponte ne’e presiza halo konstrusaun foun, tanba eziste kle’ur tebes no enjeñeiru sira observa katak ponte okos komesa nakfera no labele kontinua utiliza, nune’e tenke hadi’a fali.
“Molok halo konstrusaun, ita tenke halo uluk dalan alternativu atu movimentu tráfiku kontinua la’o no labele para. Daudaun empreza Arquiris hahú mobiliza ekipamentu atu konstrui ponte provizóriu antes harahun ponte tuan”, Samuel Marçal hateten iha Palásiu Governu, Dili.
Nia haktuir katak kona-ba orsamentu, loron hirak liubá Ajénsia Dezenvolvimentu Nasionál (ADN) fó ona rezultadu ho kustu estimativa la to’o millaun $1, tanba ponte nia medida ki’ik.
Nótisia relevante: https://tatoli.tl/2025/03/12/alargamentu-estrada-kuluhun-bekora-ho-luan-metru-2374-no-naruk-kilometru-4/
Jornalista: Arminda Fonseca
Editora: Maria Auxiliadora
