DILI, 08 Maiu 2025 (TATOLI)—Prezidente Repúblika, José Ramos Horta, kinta ne’e, hasoru malu ho Prezidente Senadu no Antigu Primeiru-Ministru Reinu Kamboja, Samdech Akka Moha Sena Padei Techo Hun Sen, hodi ko’alia kona-ba kooperasaun bilaterál entre nasaun rua no husu mós hanoin balun kona-ba oinsá hala’o dezenvolvimentu, iha Palásiu Prezidensiál Nicolau Lobato, Bairru Pite, Dili.
Notísia Relevante: PR Horta simu Hun Sen ho parada militár
“Ha’u hein katak iha enkontru ohin ne’e, ita bele habelar, hasa’e relasaun bilaterál ba iha ekonomia, ba iha komérsiu, ba iha investimentu. Ami konta ho ita-boot, belun doben Hun Sen, atu ajuda ami iha ami-nia dezenvolvimentu,” Xefe Estadu ne’e hateten ba jornalista sira liuhusi konferensia imprensa hafoin remata reuniaun bilaterál.
Tuir Horta, Hun Sen líder ida-ne’ebé hanesan mós ho Timor-Leste nia líder Kay Rala Xanana Gusmão ne’ebé lori povu rai rua ba liberdade iha situasaun ne’ebé defisíl.
“Hun Sen mak libertadór no fundadór ba Kamboja modernu. Hanesan ita-nia Primeiru-Ministru, Xanana Gusmão mak fundadór, mak libertadór no fundadór ba Timor-Leste modernu. Ita-boot na’in-rua iha semellansa estraordináriu iha maneira ne’ebé ita-boot lidera povu iha tempu susar tebes, orienta povu Kamboja nian sai husi trauma pasadu nian, ba dame no prosperidade,” Ramos Horta tenik.
Nia konta, Xanana Gusmão luta mak orienta nia povu liuhusi funu, terus, trauma, ba independénsia no ba progresu relativu ne’ebé Hun Sen Rasik asiste.
“Ita-boot hatene, ita koñese malu iha tinan barak nia laran, ha’u rasik ho Primeiru-Ministru Xanana Gusmão, ami konsidera ita-boot hanesan belun ida, belun di’ak ida ba Timor-Leste,” nia dehan.
Timor-Leste satisfeitu tebes ho relasaun bilaterál ho Kamboja no fiar ba oin relasaun sei metin liután.
Prezidente Senadu no Antigu- Primeiru-Ministru Reinu Kamboja, Samdech Akka Moha Sena Padei Techo Hun Sen, hateten haksolok tebes vizita Timor-Leste no ko’alia ho Prezidente Ramos Horta kona-ba relasaun bilaterál entre nasaun rua.
“Timor-Leste nia rekursu umanu forte, Timor-Leste iha oportunidade másimu hodi sai membru ASEAN, Timor-Leste sei hetan apoiu forte husi membru sira seluk iha ASEAN,” Hun Sen hateten.
Nia dehan, hasoru malu ho Ramos Horta momentu importante ida atu diskute kona-ba dezenvolvimentu Timor-Leste nian ba oin oinsa atu dezenvolve iha setór ekonómia.
Nune’e mós diskusaun ne’e ko’alia kona-ba relasaun bilateral entre nasaun rua ne’e, ne’ebé hahú tau konfiansa ba malu hodi kria amizade ida metin.
“Perspetiva diskusaun kona-ba asuntu rejionál no internasionál hato’o kumprimentu husi liurai Kamboja, hatoo mós konvite ofisial ba Prezidente José Ramos Horta hodi halo vizita ba Kamboja iha tempu ne’ebé apropriadu,” nia hateten.
Jornalista : Hortencio Sanchez
Editór : Cancio Ximenes
