BAUKAU, 09 Maiu 2025 (TATOLI)–Bispu Dioseze Baukau, Dom Leandro Maria Alves, konsidera Papa Leão XIV sei foku liubá vida sosiál no lori pás ba ema hotu iha mundu.
Dom Leandro Alves espresa sentimentu kontente bainhira rezultadu konklave iha Vatikanu hatudu rezultadu, Kardeál Robertum Franciscum Prevost eleitu nu’udár susesór São Pedro no kontinuadór Papa Francisco ne’ebé husik hela ona mundu.
“Papa Leão XIV mosu bele dehan esperansa. Nia hateten, keta ta’uk fó liman ba malu, harii pás. Husu igreja sai hanesan ponte fó liman ba malu entre ita ho ita, ita ho Nai Maromak,” Bispu Dioseze Baukau hateten iha Vila Nova, Baukau, sesta ne’e.
Dom Leandro salienta liuhosi diskursu dahuluk iha balkaun São Pedro hatudu Papa Leão XIV, sei kontinua misaun eminiénsia Papa Francisco liuliu kria pás no promove diálogu iha mundu hanesan bolu atensaun ba ema hotu katak pás mai husi ema-nia fuan.
“Ne’e hatudu katak Papa Leão XIV hakarak kontinua buat ne’ebé mak maktoban Papa Francisco husik hela,” Dom Leandro haktuir.
Notísia relevante: Papa Leão XIV prezide misa dahuluk iha Kapela Sistina sesta ne’e
Nia husu sarani Katólika sira reza nafatin no fó fiar ba Papa Leão XIV liuliu bele lori dame iha mundu hanesan solusiona konflitu ne’ebé atualmente mundu hasoru.
Entretantu, Papa Leão XIV ho naran kompletu Robertum Franciscum Prevost, moris iha Chicago, Ilinois Estadu Unidu Amérika (EUA), loron 14 Setembru 1955.
Papa Leão mai husi Kongregasaun Santu Agostinho ne’ebé simu ordenasaun saserdotál iha tinan 1982 no kuaze tinan barak halo misionáriu iha Chulucanas, Peru.
Aleinde ne’e, Papa Leão simu votu hanesan Bispu Chiclayo iha tinan 2015 no asumi kargu nu’udár Vise-Prezidente Konferénsia Episkopál Peruana iha tinan 2018 no hetan fiar husi Papa Francisco hanesan Kardeál iha tinan 2023.
Jornalista: Natalino Belo
Editór: Xisto Freitas da Piedade
