DILI, 09 Maiu 2025 (TATOLI) – Papa Leão XIV ne’ebé foin eleitu, iha loron 08 Maiu, iha ona nia ajenda kompromisu ne’ebé sei hahú ho momentu importante sira ba selebrasaun.
Papa foun ne’e sei selebra misa ho Kolégiu Kardeál iha sesta-feira ne’e, loron 09 Maiu, iha tuku 11h00 oras Roma (tuku 18h00 otl), iha Kapela Sistina.
Diretór Sala Imprensa Santa Sé, Matteo Bruni, informa katak, iha domingu, nia Papa sei kondús orasaun Regina Coeli iha tuku 12h00 [19h00 otl], iha loggia sentrál Bazílika São Pedro, ne’ebé prevee katak sarani rihun mak sira sei partisipa.
“Iha segunda-feira, 12 Maiu, tuku 10h00 [tuku 17h00 otl], Papa Leão XIV sei hasoru malu ho profisionál mídia iha Sala Paulo VI”, dehan.
Sorumutu ho mídia ne’e hanesan tradisaun importante ba Papa foun atu hato’o nia vizaun ba mundu no hatudu nia aprosimasaun ba mídia no komunikasaun públika.
Mensajen dahuluk Papa Leão XIV no naran ne’ebé nia eskolla
Iha diskursu dahuluk depois eleisaun, Matteu Bruni deskreve mensajen dahuluk Papa Leão XIV ba mundu hanesan apelu ba pás no diálogu.
Nia destaka mós signifikadu naran ne’ebé Papa hili, Leão XIV, ne’e referénsia ida klara ba Doutrina Sosiál Igreja nian iha era moderna.
Bruni observa katak eskolla naran ne’e la’ós de’it omenajen istórika, maibé mós referénsia ida ba mundu kontempráneu, inkluindu tema hanesan impaktu husi intelijénsia artifisiál kona-ba serbisu.
Papa Leão XIV, iha nia diskursu, destaka mós valór “diálogu” iha mundu ida frekuentemente markadu husi tensaun sira. Nia enfatiza katak “Maromak kuidadu ita, hadomi imi hotu, buat aat sei labele manán”, rekorda mesanjen Papa Francisco iha domingu Páskoa nian.
Notísia relevante: Tanbasá Papa foun Robert Francis Prevost hili naran “Papa Leão XIV”?
TATOLI
