DILI, 09 Maiu 2025 (TATOLI) – Kardeál Robert Francis Prevost ne’ebé eleitu ba Papa Leão XIV mak Pontífise dahuluk agostinianu nian, ne’ebé mai husi Estadu Unidu Amérika no Papa amerikanu daruak depoizde Francisco.
Papa Leão XIV eleitu iha idade 69 liuhusi eleisaun Konklave loron daruak iha Kapela Sistina, Vatikanu.
Iha loron 01 Setembru 1977, nia tama ba novisiadu Ordem de Santo Agostinho (OSA) iha St. Louis, iha provínsia Nossa Senhora do Bom Conselho, iha Chicago, no halo nia profisaun dahuluk iha 02 Setembru 1978. Iha 29 Agostu 1981, nia halo votu solones.
Nia lema episkopál ne’ebé nia kaer metin mak “In Illo uno unum”, palavra ne’ebé Santu Agostinho pronunsia iha omília, Espozisaun kona-ba Salmo 127, atu esplika katak “embora nós cristãos sejamos muitos, no único Cristo somos um” ka “maski ita kristaun sira barak, iha Kristu ida de’it, ita sai ida de’it”.
Santu Agostinho mak Orden Papa Leão XIV ne’ebé kria iha sékulu XIII. Orden ne’e kria husi Papa Inocêncio IV, ne’ebé unui grupu oioin eremítiku ne’ebé espalla iha Itália, no husu sira adota estilu moris ida de’it no Regra Santu Agostinho nian, ne’ebé inklui, entre prinsípiu sira seluk, pobreza, obidiénsia, dezapegu ba mundu, repartisaun serbisu no karidade, haktuir husi SIC Notícias ne’ebé Tatoli sita.
Orden Santu Agostinho, ne’ebé Papa Leão XIV pertense, kria iha 1244 ho Bula “Incumbit nobis”, husi Papa Inocêncio IV no simu impulsu foun iha 1256 husi Papa Alexandre IV.
Tuir Anuáriu Katóliku, kona-ba karizma no misaun Orden nian, agostinianu sira fó prioridade ba “esperiénsia ho Maromak, dedika an ba estudu no vida interiór”, ba moris apostólika tuir nesesidade Igreja nian, dedikasaun ba serbisu (manuál no intelektual) ba moris di’ak komunidade, no “buska maromak no interioridade”.
Papa Leão XIV moris iha loron 14 fulan-Setembru tinan 1955 iha Chicago, Illinois, oan husi Louis Marius Prevost, orijen husi fransa no italianu, no Mildred Martínez, española.
Nia hanesan Papa ba da-267 iha istória Igreja Katólika nian no ba sarani Katólika hamutuk billaun 1,4 iha mundu.
Notísia relevante: Tanbasá Papa foun Robert Francis Prevost hili naran “Papa Leão XIV”?
TATOLI
