Membru PNTL Vikeke na’in-128 hetan promosaun tranzitóriu diviza
VIKEKE, 09 Maiu 2025 (TATOLI)—Membru Polísia Nasionál Timor Leste (PNTL) munisípiu Vikeke hamutuk na’in-128, sesta ne’e, ofisialmente hetan promosaun tranzitóriu diviza husi komandu PNTL munisípiu Vikeke.
Notísia Relevante: MI divulga promosaun tranzitória diviza ba PNTL Viqueque
Reprezentante Ministru Interiór (MI) no atuál xefe Gabinete husi MI no Prezidente Komisaun Tranzitóriu PNTL, Paulo Asis Belo, haktuir promosaun ida-ne’e prepara durante fulan neen no Governu buka oinsá rezolve problema PNTL sira hasoru hanesan problema diviza, problema saláriu no problema reforma.
“Iha tinan kotuk ba reingresu ba membru PNTL ne’ebé reforma no Governu reintegra membru sira, atu hadi’a sira-nia kondisaun. Antes ba reforma, agora daudaun sira sei ativu. Tuir Governu hadi’a estatutu polísia nian ba promosaun tranzitóriu, ita konsege halo promosaun tranzitóriu,” Paulo Asis Belo, hateten iha serimónia promosaun iha resintu PNTL munisípiu Vikeke, ohin.
Dalaruma, nia dehan, promosaun ida-ne’e ema balun la satisfas ba membru sira hotu maibé ida-ne’e mak Governu nian esforsu hodi bele revolve problema sira-ne’ebé iha PNTL nian laran.
“Ohin, tula diviza ba membru PNTL sira, hasa’e mós ita-boot sira-nia responsabilidade boot liután nu’udar membru PNTL,” nia hateten.
Reprezentante Komisáriu Jerál PNTL atuál Inspitór Jeral PNTL, Superintendente Xefe Jorge Monteiro, hato’o agradesimentu ba Governu Konstitusionál IX ninia polítika kompromisu hodi halo revizaun ba estatutu pesoál PNTL nú. 69/2022 no estatutu pesoál nú. 35/2024 hamosu oportunidade hodi hamosu artigu 155 alinea 1 to’o 9 ne’ebé fó promosaun tranzitóriu ba membru PNTL.
“Hanesan membru PNTL mai ita hamutuk família ho sentidu onra no orgullu hodi hato’o ita-nia obrigadu ba Governu Konstitusionál da-sia (IX) no Ministru Interiór. Ohin, ita bele realiza promosaun tranzitóriu no antiguidade ba membru PNTL sira iha territóriu nasionál no ohin ita realiza iha PNTL munisípiu Vikeke,” nia dehan.
Nia hatutan, promosaun ida-ne’e hodi rekoñese no valoriza membru PNTL sira iha komandu munisípiu Vikeke.
“Ha’u hakarak hateten katak prestasaun servisu ho dixipliña, ita-nia onestidade, ita-nia sinseridade, ita-nia lealidade, ita-nia loialidade, ita-nia neutralidade, imparsialidade, ita-nia servisu profesionál. Hanesan ita-nia esperansa no espetativa ba ita-nia Estadu, Governu, sidadaun no ita-nia instituisaun ita tenke kria posiblidade hotu-hotu, hodi nune’e ita bele tane aas hodi serve no proteje,” nia hateten.
Nia hateten, membru PNTL hetan promosaun iha munisípiu Vikeke katak la’ós oferta gratuita, la’ós prémiu gratuita, la’ós prezente, la’ós mós rekompensa gratuita. Maibé, ida-ne’e nu’udár rekoñesementu altu husi Estadu, Governu no PNTL ba direitu fundamentál.
“Nu’udár membru PNTL, ba ita-boot sira-nia dixiplina servisu profisionál no lealidade, protidaun iha tinan naruk, ba misaun serve no proteje,” nia dehan.
PNTL sai hanesan instrumentu direitu demokrátiku Timor-Leste ba asuntu interna, pilár Estadu nian ba aspeitu seguransa nasionál no seguransa interna hodi garante pás no trankuilidade.
“Ha’u husu ba emposadu sira hotu tenke kuida diviza ne’ebé ohin simu hodi sai motivasaun ida-ne’ebé di’ak ba ita-boot sira,” nia hateten.
Iha biban ne’e, Komandante PNTL munisípiu Vikeke, Superintendente Polísia António Rego Fernandes, aprezenta membru PNTL munisípiu Vikeke totál hamutuk na’in-138, kuaze 95% mak simu promosaun tranzitóriu diviza ba kategória sira henesan superintendente asistente, inspetór xefe, inspetór, inspetór asistente, sarjentu xefe na’in, primeiru sarjentu, ajente xefe no ajente prinsipál.
“Durante ne’e, membru sira hala’o sira-nia servisu ho responsablidade iha área jurídiku munisípiu Vikeke. Ho nune’e, diviza ne’ebé membru PNTL Vikeke sira hetan, ha’u husu agradese ba Governu Konstitusionál da-sia (IX) liuhusi MI ba promosaun tranzitóriu no liuhusi promosaun ida-ne’e bele prienxe ona estrutura PNTL munisípiu Vikeke ne’ebé mamuk iha tinan barak nian laran. Tan ne’e, ami nafatin hato’o ba komandu jerál PNTL hodi kria kondisaun hodi eleva kapasidade ba membru PNTL sira-ne’ebé agora simu promosaun,” nia dehan.
Tuir dadus promosaun tranzitóriu ba membru PNTL munisípiu Vikeke totál hamutuk na’in-128 hetan kompostu husi superintendente asistente na’in-tolu (3), inspetór xefe na’in-hitu (7), insepitór na’in-ualu (8), inspetór asistente na’in-45, sarjentu xefe na’in-45, primeiru sarjentu na’in-18 no ajente xefe na’in-ida (1) no ajente prinsipál na’in-ida (1).
Partisipa iha serimónia promosaun tranzitóriu ba membru PNTL munisípiu Vikeke Prezidente Autoridade munisípiu Vikeke, Konsellu Veteranu Vikeke, autoridade lokál, komandante PNTL, diretór servisu Vikeke no família husi membru PNTL munisípiu Vikeke.
Jornalista : Vitorino Lopes da Costa
Editór : Cancio Ximenes
