DILI, 09 Maiu 2025 (TATOLI) – Kardeál eleitór 133 eleitu ona Sumu Pontífise Igreja Katólika nian iha votasaun ba dahaat nian iha Reuniaun Konklave iha Vatikanu, iha kinta-feira loraik ne’e.
Suar mutin sai husi xaminé Kapela Sistina nian ne’ebé hatudu katak Kardeál sira hetan ona konsensu hodi hili Papa ba da-267 hodi sai susesór Francisco.
Suar mutin ne’e sai iha tuku 18h00 oras Roma ka tuku 1h00 madrugada otl nian. Sinu Bazílika São Pedro nian toka repike hodi fó sai katak Papa foun iha ona.
Daudaun seidauk hatene Kardéal ida ne’ebé mak eleitu ona no eskolla naran Papa nian.
Kardeál Protodiákonu, Dominique Mamberti, sei mosu iha varanda sentrál Bazílika São Pedro atu anunsia ba sarani sira palavra “habemus papam”.
Depois minutu balun anúnsiu ne’e, Pontífise foun sei mosu iha janela Prasa São Pedro nian no halo orasaun dahuluk.
“Suar mutin! Kardeál eleitór 133 ne’ebé halibur iha Kapela Sistina iha Vatikanu eleje tiha ona Papa foun. Nia sei mosu iha tempu badak janela sentrál Bazílika São Pedro nian”, haktuir husi Vatikan news.
Susesór Francisco nian, ne’ebé hakotu iis iha loron 21 Abríl, eleitu iha loron daruak reuniaun Konklave ne’ebé inisia iha kuarta-feira ne’e, depois votasaun dala-haat: ida iha loraik iha 07 Maiu, rua iha kinta dadeer no ida iha loraik.
Lembra katak eleisaun ba Papa sira antes, iha 2005 no 2013, hala’o durante loron rua, maibé votasaun balun iha sékulu anteriór realiza durante loron lima. No iha eleisaun ida ne’ebé kle’ur liu durante tinan tolu, entre Novembru 1268 no Setembru 1271.
Konklave tinan 2025 mak boot no internasionál liu hotu ne’ebé iha no reúne Kardeál sira husi nasaun kuaze 70.
Notísia relevante: Kardeál sira seidauk iha konsensu, eleisaun ba Papa foun kontinua
TATOLI
