DILI, 09 Maiu 2025 (TATOLI) – Governu Timor-Leste, lori povu Timór nia naran parabeniza Papa Leão XIV, ne’ebé eleitu iha loron 08 fulan-Maiu 2025 nu’udar Sumu Pontífise Igreja Katólika nian ba da-267.
Iha nota ne’ebé Governu hato’o, Timor-Leste mós iha esperansa atu Santidade Papa Leão XIV mós bele vizita Timor-Leste no asiste, ho matan rasik, fiar no lasu ne’ebé metin ne’ebé halibur povu timoroan ho Igreja Katólika.
Ministru Prezidénsia Konsellu Ministru no Portavós Governu nian, Agio Pereira, afirma katak “Timor-Leste oras ne’e hanoin hikas ezemplu inspiradór Papa Francisco nian, ne’ebé marka nia pontifikadu ho lideransa haraik-an, besik ba povu no firme iha defeza justisa sosiál nian. Ami fiar ho laran-tomak katak, Papa Leão XIV bele kontinua legadu hakbesik-an ba ki’ak sira, promove dame no diálogu entre relijiaun sira”, dehan.
Robert Francis Prevost, Papa dahuluk husi Orden Santu Agostinho, moris iha Chicago, iha tinan 1955. Ho karreira ne’ebé marka ho tinan balun misaun pastorál nian iha Peru, iha-ne’ebé nia serbí nu’udar bispu Chiclayo no hetan nasionalidade peruana, Papa Leão XIV hetan rekoñesimentu luan tanba ninia kompromisu ba justisa sosiál no inkluzaun ba sira ne’ebé vulneravel liu.
“Timor-Leste, nu’udar nasaun fiar-na’in ne’ebé nia abut metin iha tradisaun katólika, hanoin hikas ho emosaun vizita pastorál Papa Francisco nian iha fulan-Setembru 2024. Santu Padre nia prezensa nu’udar momentu markante ida ba renovasaun espirituál no hametin lasu istóriku entre povu timoroan no Santa Sé, lori mensajen esperansa, unidade no pás, ho énfaze espesiál ba knaar juventude nian no importánsia atu prezerva valór kulturál no espirituál povu timoroan nian”.
Rekorde mós vizita Saun João Paulo II nian iha 1989, tempu ida ne’ebé difísil tebes iha istória nasionál, ne’ebé lori ánimu no korajen ba povu timoroan, ne’ebé ema hotu sei hanoin-hetan nafatin.
Durante tinan barak okupasaun nian, Igreja Katólika hala’o knaar esensiál hodi fó apoiu ba povu timoroan, sai hanesan mahon iha-ne’ebé ema barak hetan protesaun, forsa espirituál no korajen atu reziste.
Notísia relevante: Papa Leão XIV sei prezide misa dahuluk iha Kapela Sistina sesta ne’e
TATOLI
