DILI, 10 Maiu 2025 (TATOLI) – Misa inaugurasaun potifikadu Leão XIV sei hala’o iha loron 18 Maiu, tuku 10h00 oras Roma (tuku 17h00 otl) iha Prasa Saun Pedro, divulga Sala Imprensa Santa Sé.
Iha sesta-feira depoizde eleitu, Leão XIV selebra ona nia misa dahuluk hamutuk ho Kolégiu Kardeál, iha Kapela Sistina, ne’ebé selebrasaun ne’e la’ós ba públiku.
Iha domingu dadeer, 18 Maiu, misa espesiál ne’e sei selebra iha Vatikanu atu marka inísiu ba nia pontifikadu Leão XIV. Nia aundiénsia jerál ho sarani sira sei realiza iha kuarta-feira, 21 Maiu.
Kaléndáriu ne’ebé fó sai husi Prefeitura Casa Pontifícia katak Papa sei halo audiénsia ho Kardeál sira, iha sábadu ne’e, 10 Maiu, no domingu hasoru malu ho sarani sira, iha Prasa Saun Pedro iha orasaun Regina Caeli iha varanda sentrál Bazílika Vatikanu, iha meiu-dia oras Roma.
Iha segunda-feira, 12 Maiu, Papa sei halo audiénsia ho jornalista sira, tuku 10h00 (17h00 otl), iha Auditóriu Paulo VI.
Selebrasaun sira kona-ba inísiu Ministériu bispu Roma inklui tomada pose kátedra iha Bazílika Saun João Latrão, Katedrál dioseze romana, no tomada pose Bazílika Papál Santa Maria Maiór, ne’ebé akontese iha 25 Maiu.
Tomada pose Bazílika Papál Saun Paulo Fora dos Muros realiza iha 20 Maiu.
Amu-Papa foun sei simu membru korpu diplomátiku akreditadu juntu Santa Sé, iha 16 Maiu.
Iha 24 Maiu, Papa foun sei simu audiénsia membru Kúria Romanu no funsionáriu Estadu Sidade Vatikanu sira-nian.
Papa Leão XIV eleitu ho idade 69 liuhusi eleisaun Konklave loron daruak, 08 Maiu, iha Kapela Sistina, Vatikanu.
Papa Leão XIV moris iha loron 14 fulan-Setembru tinan 1955 iha Chicago, Illinois, oan husi Louis Marius Prevost, orijen husi fransa no italianu, no Mildred Martínez, española.
Nia hanesan Papa ba da-267 iha istória Igreja Katólika nian no ba sarani Katólika hamutuk billaun 1,4 iha mundu.
Notísia relevante: Papa Leão XIV prezide misa dahuluk iha Kapela Sistina sesta ne’e
TATOLI
