DILI, 11 Maiu 2025 (TATOLI) – Papa esplika razaun hili naran Leão XIV ba nia potifikadu durante hala’o enkontru formál ho Koléjiu Kardinalísiu iha Sala Nova do Sínodo, Vatikanu, sábadu ne’e.
Papa agostinianu dahuluk ne’e justifika katak eskolla Leão XIV atu defende dignidade ema nian no direitu sosiál relasiona ho revolusaun dijitál no intelijénsia artifisiál (IA).
Iha nia diskursu, hanesan haktuir husi Vatican News, nia naran inspira husi Papa Leão XIII, ne’ebé lidera igreja, entre 1878 no 1903. Leão XIII mak fundadór Doutrina Sosiál Igreja nian no ba dahuluk ne’ebé inklui iha Ensíklika Rerum novarum iha 1891, ne’ebé ko’alia kona-ba problema sira husi klase operária, depoizde Revolusaun Industriál.
“Papa Leão XIII, de fatu, ho Ensíklika istórika ‘Rerum Novarum’, enfrenta kestaun sosiál iha kontestu revolusaun industriál dahuluk; no agora Igreja oferese ba ema hotu nia doutrina sosiál atu hatán ba revolusaun industriál foun no ba dezenvolvimentu intelijénsia artifisiál, ne’ebé lori dezafiu foun atu defende dignidade umana, justisa no serbisu”, Papa haktuir iha Vatican News.
Papa norte-amerikanu ne’e hato’o, iha sorumutu ne’e, gratidaun ba Kardeál sira-nia serbisu, durante Sé Vacante no reafirma katak nia hakarak la’o tuir Konsíliu Vatikanu II no tuir Papa Francisco, ho énfaze ba misaun, sinodalidade no justisa sosiál.
Lembra katak maktoban Papa Francisco, ne’ebé hakotu iis iha fulan kotuk, fó atesaun katak IA iha risku atu troka relasaun entre ema sai algoritmu de’it. Nia husu atu iha akordu internasionál hodi regula IA.
Francisco fó atensaun, iha tinan kotuk, ba nasaun G7 ka país indústria boot katak IA tenke nafatin konsentra iha ema. Nune’e desizaun kona-ba bainhira mak uza arma ka meiu ne’ebé la oho, labele monu ba mákina nian liman, sita husi Tempo.
Papa Leão XIV eleitu ho idade 69 liuhusi eleisaun Konklave loron daruak, 08 Maiu, iha Kapela Sistina, Vatikanu.
Papa Leão XIV moris iha loron 14 fulan-Setembru tinan 1955 iha Chicago, Illinois, oan husi Louis Marius Prevost, orijen husi fransa no italianu, no Mildred Martínez, española.
Nia hanesan Papa ba da-267 iha istória Igreja Katólika nian no ba sarani Katólika hamutuk billaun 1,4 iha mundu.
Notísia relevante: Misa inaugurasaun ba Papa Leão XIV selebra iha 18 Maiu iha Vatikanu
TATOLI
