DILI, 12 Maiu 2025 (TATOLI) –Autoridade Protesaun Sívil (APC) liuhusi servisu Gabinete relasaun esterna no komunikasaun kontinua halo sensibilizasaun kona-ba enkuadramentu no servisu atendimentu APC nian iha dezastre naturál ba autoridade lokál sira.
Xefe gabinete relasaun esterna no kumunikasaun, Nelson Nunes de Orleans informa katak husi parte GREK-APC sira iha programa ida hodi fó koñesimentu ba autoridade lokál sira atu evita dezastre naturál.
“Razaun ami sensibiliza ba autoridades lokais sira tanba ita hotu hatene katak, autoridades lokais mak besik liu ho komunidade sira, entaun sofrementu ho buat sira-ne’ebé komunidade sira enfrenta sira mak hatene liu”, Xefe gabinete ne’e hateten.
Notísia relevante:APC rejista tipu kazu dezastre naturál oioin iha territóriu nasionál
Tanba papél APC nian atu halo prevensaun, halo resposta revensaun ba uma sira-ne’ebé hetan afetadu ba ambiente inklui ema.
“Ho nune’e ami-nia programa liuliu ba parte GREK-APC ami halo diseminasaun ba enkuadramentu legais, ba ita-nia lideransa suku sira atu hatene no konta informasaun lala’ok kona-ba papél servisu husi APC nian”, xefe ne’e informa.
Ezekutivu ne’e hatutan katak APC mak sai hanesan emerjénsia ka resposta ba komunidade sira-ne’ebé hetan afetadu ba dezastre naturál.
Nune’e ho programa ne’e atu fó koñesimentu kle’an ba autoridade lokál sira hatene prosesu atendimentu rekuperasaun nian no pakote emerjénsia. “Ida-ne’e mak sai objetivu prinsipál ida ba ami atu bele sensibiliza informasaun servisu atendimentu APC nian ba akontesimentu dezastre naturais”, nia aprofunda.
Iha trimestál dahuluk ne’e APC hala’o ona programa ne’e iha munisípiu Lauten no Aileu iha trimestrál daruk hala’o iha munisípiu Ainaru no Likisá no tinan ida-ne’e sei kontinua sensibiliza mós ba munisípiu sira seluk inklui territóriu nasionál.
“Klaru husi sensibilizasaun programa ida-ne’e iha mudansa haree liuhusi verifikasaun dadus, iha tinan kotuk ho tinan ida-ne’e diferente. Tinan ne’e, númeru dezastre naturais ne’e kiik katak prevensaun ba dezastre naturais ne’e influénsia makas’as tebes”, nia hateten.
Entretantu, misaun husi APC nian mak planea koordena hodi ezekuta orden polítika no resposta emerjénsia ba dezastre sira; Atu garantia rikusoin no patrimóniu Estadu nian iha edifísiu públiku sira; Atu garantia pás liuhusi prevensaun kompletu komunitária ne’ebé iha baze liuliu iha suku no aldeia sira.
Vizaun maka atu resposta emerjénsia ba ameasa sira ne’ebé afeta nasaun liuliu ba dezastre sira liuhusi motto/lema “Proteje no Serbi” proteje populasaun liuhusi ameasa sira no serbi ne’e katak prontu atende imediatamente sériu antes dezastre mosu.
Jornalista: Alexandra da Costa
Editór: Rafael Ximenes de A. Belo
