DILI, 12 Maiu 2025 (TATOLI) – Deputada husi bankada CNRT, Cedelízia Faria dos Santos, husu ba Governu atu aselera nomeasaun ba Prezidente Autoridade Munisípiu (PAM) Dili nian.
Deputada ne’e dehan PAM Dili daudaun ne’e mamuk dezde eis-Prezidente Gregório Saldanha rezigna-an iha fin Janeiru 2025, maski iha diretór-jerál ida mak asume interinamente kargu ba PAM Dili nian.
“Maibé, ha’u hanoin katak serbisu munisípiu Dili ne’e barak tebetebes no komplikadu, tanba ne’e mak hakarak ka lakohi ita tenke iha ita-nia prezidente autoridade ida para bele hala’o funsaun sira ne’e”, Cedelízia Faria hato’o iha reuniaun plenária Parlamentu Nasionál (PN), ohin.
Prezidente Komisaun C ne’ebé trata Asuntu Finansa Públika ne’e toka kestaun referida tanba liga ba ezekusaun Orsamentu Jerál Estadu (OJE) Autoridade Munisípiu Dili nian.
“Ha’u ko’alia ida-ne’e tanba paresér ho ami Komisaun C nian relasiona ho OJE ba trimestre ikus iha tinan 2024 hatudu katak ezekusaun munisípiu Dili nian maka ki’ik liu, atinje 77,6%”, nia relembra.
Iha ezekusan OJE 2025, Autoridade Munisípiu Dili iha trismestre dahuluk foin atinje 35% husi orsamentu alokadu orsamentu hamutuk millaun $19,2.
“Ami preokupa tanba tau osan boot entre munisípiu hotu-hotu no munisípiu Dili mak nia orsamentu boot liu, maibé ho vagatura ba ita-nia prezidente autoridade ne’e hanoin sei fó impaktu barak”, dehan.
Tanba ne’e, nia husu ba Vise-Ministru ba Asuntu Parlamentár atu hato’o kestaun kona-ba nomeasaun ne’e. “Se la’e, bele fó impaktu ba sira-nia ezekusaun, fó impaktu mós ba serbisu barak”, katak.
Iha reuniaun plenária, reprezentante Governu, liuhusi Vise-Ministru ba Asuntu Parlamentár, Adérito Hugo da Costa, rejista preokupasaun no sei hato’o ba entidade relevante.
Antes ne’e, Ministériu Administrasaun Estatál, liuhusi Diresaun-Jerál Desentralizasaun Governasaun Lokál informa katak sei anunsia, iha tempu badak, rekrutamentu foun ba PAM Dili.
Servisu Autoridade Munisipál Dili daudaun ne’e lidera interinu husi Diretór-Jerál Dezentralizasaun Governasaun Lokál, António Agosto Guterres, hodi substitui PAM Dili, Grogório Saldanha, ne’ebé rezigna-an iha 28 Janeiru ne’e.
Notisiarelevante:dili/https://tatoli.tl/2025/05/09/mae-sei-re-anunsia-rekrutamentu-foun-ba-pam-dili/
Jornalista: Nelson de Sousa
Editora: Maria Auxiliadora
