Empreza Seramor sei entrega ró peska unidade 40 ba MAPPF
DILI, 12 Maiu 2025 (TATOLI)- Empreza Seramor entrega, iha Maiu ne’e, ró peska hamutuk unidade 40 ba Ministériu Agrikultura, Pekuária, Peska no Floresta (MAPPF), informa Diretór-Jerál Peska, Acácio Guterres.
Nia dehan akizisaun ba ró peska ne’e empreza konklui ona no horisehik sira haruka ona karta ba ministériu, nune’e tékniku sira bele bá halo inspesaun mak entrega.
“Tuir planu, fulan ida ne’e empreza sei entrega ró peska unidade 40 ho nia mákina elétrika hamutuk 40”, Acácio Guterres dehan ba Tatoli, ohin.
Ba akizisaun ró peska ne’e, ministériu kontrata empreza rua, Auto Zone responsabiliza ba ró 100 ho nia mákina elétrika 100 no Seramor sosa ró 40 ho nia mákina 40.
Maibé, empreza Auto Zone daudaun seidauk bele entrega, tanba foin lalais husu pedidu ba ministériu atu estende fulan balu tan mak foin entrega.
“Husi ró 140 ne’e, empreza Auto Zone ita prevee orsamentu $744.080 no Seramor rihun $216”, nia adianta.
Antes ne’e, Ministru Agrikultura, Pekuária, Peska no Floresta, Marcos da Cruz, hateten akizisaun ró peska ne’e importante, tanba daudaun peskadór barak hatama ona pedidu maibé ró mak seidauk iha.
“Ró sira ne’ebé ita iha tinan kotuk distribui hotu ona. Iha parte kosta norte nian, ami halo deskarregamentu iha Lautém-Com. Haree katak ró ne’e apoia duni peskadór sira ba kail ikan. Sira la’o kalan rua, loron rua, ho ró 23 no fila mai hetan ikan tonelada tolu”, dehan.
Husi parte ministériu nafatin apoia peskadór sira no halo monitorizasaun ba sira-nia atividade. “Ita hein katak ró ne’e mai ajuda tan peskadór sira buka ikan no fa’an ba merkadu”, nia realsa.
Ministériu antes ne’e sosa, iha 2022, ró 110 ho osan rihun $500, maibé 22 maka nia prosesu iha hela justisa. Ró ne’e fahe ona ba peskadór sira iha kosta súl nian hanesan iha Manatuto-Natarbora, Covalima-Suai no Bobonaro-Atabae no tinan ne’e kontinua fahe.
Ministériu disponibiliza bero ba peskadór sira nu’udar meiu transporte ida atu hala’o sira-nian atividade loroloron nian iha tasi hodi bele lori bá fa’an iha merkadu.
Notísia relevante: https://tatoli.tl/2025/01/28/mappf-halo-akizisaun-ba-ro-peska-unidade-140/
Jornalista: Arminda Fonseca
Editora: Maria Auxiliadora
