VIKEKE, 12 Maiu 2025 (TATOLI)—Juventude husi suku Irabin de Baixu, postu administrativu Uatukarbau, munisípiu Vikeke, iha inisiativa rasik normaliza ponte ki’ik ne’ebé kotu iha suku Irabin de Baixu.
Notísia Relevante: MOP Viqueque planu normaliza estrada ne’ebé kotu iha Uatulari
Xefe suku Irabin de Baixu, José Baptista do Carmo, haktuir ponte ne’ebé kotu lokaliza iha suku Irabin de Baixu liga ba suku Loihulu, Afaloikai, Bahatata iha postu Uatukarbau nomós liga ba postu Iliormar (Lautein) tanba kauza husi empreza sira ho kamineta tula materiál todan, halo ponte kotu hodi difikulta ba movimentu transporte sira.
“Ponte ne’e estrada nasonál ne’ebé liga ba suku tolu no ba Ilimor liuhusi ponte ida-ne’e. Maibé, ponte ne’e kotu, rai sai kle’an hodi transporte sira hanesan karreta no motorizada sira liu ponte ne’e ladi’ak. Entaun, ami-nia joven sira foti inisiativa ateru rasik ka hadi’a ponte ne’e,” José Baptista do Carmo hateten ba TATOLI, iha postu Uatucarbau, ohin.
Ba normalizasaun ne’e, nia dehan, apoia mós husi administradór postu Uatukarbau kontaktu empreza sira iha postu Uatukarbau hodi apoia karreta tula rai-henek iha mota no apoia mós eskavatór husi Ministériu Agrikultura, Pekuária, Peska no Floresta (MAPPF) hodi suru rai-henek ba karreta hodi normaliza di’ak ponte referida.
“Nune’e, daudaun ne’e ponte ne’ebé ita-nia joven sira halo ona normaliza transporte karreta no motorizada liu iha leten di’ak fali ona. Maibé, kuandu udan boot mai tán ne’e, bele estraga fila-fali ba ponte ne’ebé joven sira halo normalizasaun,” nia informa.
Tanba ne’e, nia husu ministériu kompetente hodi tau atensaun ba estrada no ponte sira-ne’ebé aat, atu nune’e labele difikulta ba komunidade nia movimentu iha postu administrativu Uatukarbau.
“Nu’udar autoridade lokál ami hakarak husu Governu presiza hadi’a dalan sira-ne’e hodi fasilita movimentu transporte sira, tanba dalan ne’e parténsia ba nasionál. Bainhira la hadi’a dalan sira-ne’e sei difikulta ba ita-nia komunidade,” nia dehan.
Jornalista : Vitorino Lopes da Costa
Editór : Cancio Ximenes
