VIKEKE, 12 Maiu 2025 (TATOLI)—Ministériu Obra Públika (MOP) identifika empreza Zamatil Unipesoál, Lda, ne’ebé mnán pakote manutensaun estrada sira iha munisípiu Vikeke, durante ne’e la implementa projetu obra manutensaun ba estrada-ko’ak sira.
Notísia Relevante: PAM Vikeke koordena ho empreza GRIG-VOVEC normaliza estrada iha Vikeke Vila
“Empreza Zamatil Unipesoál, Lda, manán tiha konkursu no asina ona kontratu tinan rua liubá maibé iha implementasaun laiha, entaun ha’u konsidera empreza lakohi ezekuta. Tuir loloos, empreza ne’e laiha kapasidade, hato’o karta ruma ba MOP hodi substitui empreza seluk ne’ebé segundu vensedór hodi implementa obra manutesaun ba estrada-ko’ak sira iha Vikeke,” Asesór Vise Ministériu Obra Públika (MOP), Rui Hernania Guterres, hateten Guterres ba Tatoli, iha resintu administrasaun Vikeke, ohin.
Nia konsidera, empreza Zamatil Unipesoál, Lda, laiha seriedade ba povu Vikeke, karik laiha kapasidade ba ezekuta implementasaun tenke hato’o karta ba MOP atu ema seluk bele kaer obra hodi hadi’a dalan aat sira-ne’e, maibé ida-ne’e mós empreza la hateten.
“Tuir loloos, orsamentu ba manutensaun ne’e utiliza ona tinan 2022 ho totál rihun $800 ba obra manutensaun mak taka estrada-ko’ak sira iha munisípiu Vikeke laran tomak, maibé empreza la implementa. Maibé orasamentu manutensaun ne’e agora sei rai hela, tanba ne’e ami sei informa fila-fali ba ministériu hodi halo intervensaun ruma,” nia dehan.
Alende ne’e, nia husu Prezente Autoridade Munisípiu Vikeke hato’o ba Ministru Obra Públika (MOP) liga ba implementasaun obra manutesaun estrada sira iha munisípiu Vikeke ne’ebé empreza responsávél la ezekuta obra.
“Ha’u sente asuntu ida-ne’e importante loos. Karik orsamentu ba manutensaun laiha ne’e di’ak. Maibé, orsamentu ba manutensaun iha hela, estrada-ko’ak barak difikulta ba ita-nia komundiade nia movimentu ba-mai. Empreza ida-ne’e sai hanesan pekadu kontra povu Vikeke tanba legalmente empreza asina kontratu ho Governu, ikus mai la implementa,” nia hateten.
Prezidente Autoridade Munisípiu (PAM) Vikeke, Francisco C.S de G. Soares, husu MOP hapara empreza manutensaun estrada sira iha munisípiu Vikeke, troka fali empreza seluk hodi implementa obra manutensaun ba estrada-ko’ak sira husi postu mai Vikeke Vila.
“Ami sujere MOP troka tiha empreza responsavél ba manutensaun ne’ebé la implementa obra hodi tau empreza seluk ne’ebé iha kondisaun. Tan de’it, empreza sira hahalok ita prejudika munisípiu Vikeke no difikulta ita-nia agrikultór sira-nia produtu lokál asesu ba merkadu mós difisil ba komunidade,” nia dehan.
Jornalista : Vitorino Lopes da Costa
Editór : Cancio Ximenes
