VIKEKE, 13 Marsu 2025 (TATOLI)—Prezidente Autoridade Munisipiu (PAM) Vikeke, Francisco Cruz Simões de Gonzaga Soares, koordena ho empreza internasionál Xineza GRIG-COVEC apoiu halo normalizasaun ba estrada kuak sira iha Vikeke Vila hodi labele difikulta movimentu transporte no ema la’o ain ba-mai.
Notísia Relevante: Veteranu sira preokupa kondisaun estrada Viqueque Vila ne’ebé nakonu ho tahu
Diretór Servisu Obra Públika munisípiu Vikeke, Casildo Gomes, hatetenr PAM Vikeke hamutuk SMOP foin lalais ne’e halo koordenasaun ho empreza GRIG-COVEC ajuda halo normalizasaun estrada kuak sira husi Wetisi to’o área Lugatoi, atu taka dalan-kuak sira-ne’e fasilita movimentu iha Vila laran.
“Foin lalais, segunda (10 Marsu 2025) ne’e, ami hamutuk ho PAM halo koordena ho GRIG-COVEC ne’ebé parte empreza mós aseita hakarak apoiu halo normalizasaun gratuita ba munisípiu Vikeke. Tuir lolos ne’e, horisehik ami halo normaliza maibé horisehik (11 Marsu 2025) udan boot, nune’e ami labele ateru dalan sira-ne’e, tanba ita ateru ne’e presiza bee ne’ebé nalihun iha estrada klaran sira-ne’e maran, hafoin ateru di’ak,” Casildo Gomes hateten ba TATOLI, iha ninia kna’ar fatin, Beloi, ohin.
Nia dehan, normalizasaun estrada kuak ne’e sei haree udan bainhira udan para empreza sei apoiu ekipamentu pezadu Gleder hodi halo tetuk estrada kuak sira.
“Tanba dalan kuak sira-ne’e sai preokupasaun husi ita-nia komunidade iha munisípiu Vikeke nian. Tan ne’e, ami esforsu hamutuk ho autoridade sira husu ajuda ba empreza sira fó apoiu hodi ateru dalan kuak sira,” nia dehan.
Alende ne’e, nia dehan, ba normalizasaun estrada kuak sira-ne’e sei apoiu mós empreza Hoven 2 apoiu karreta hodi tula rai-henek fakar no ateru ba dalan kuak sira no GREG-COVEC sei apoiu karreta no Gleder.
“Inisiativa ne’e ami halo hodi normaliza estrada vila laran sira-ne’e, atu labele difikulta komunidade buka moris. Nune’e, mós ami sei esforsu hodi kontaktu empreza sira iha munisípiu Vikeke hodi fó hotu sira-nian apoiu ba normalizasaun estrada referida,” nia hateten.
Ba normalizasaun Estrada ne’e, nia dehan, normaliza provizóriu hodi hein nasionál tau projetu reabilitasaun ba estrada husi Wetisi to’o Lugatoi.
“Normalizasaun ita halo hodi hein nasionál, tanba ne’e estrada nasionál ne’ebé kompeténsia husi nasionál. Ami mós aprezenta ona ba MOP nasionál hodi haree estrada iha kapitál laran ne’ebé kondisaun aat sira-ne’e hodi hadi’ak di’ak liután,” nia dehan.
Entretantu, ba noramliza estrada husi Wetisi to’o área Lugatoi purvolta kilómetru haat (4), maibé empreza sira estretu ba estrada kuak sira-ne’ebé difikulta ba transporte karreta no motorizada sira.
Notísia Relevante: Empreza hahú mobiliza ekipamentu manutensaun estrada Viqueque Vila-suku Uma-Uain Leten
Jornalista : Vitorino Lopes da Costa
Editór : Cancio Ximenes
