DILI, 12 Maiu 2025 (TATOLI)–Reprezentante Arkidiozese Dili, Pe. Juvito do Rego, husu ba sarani sira labele espalla informasaun falsa iha mídia sosiál kona-ba Amu Domingos Maubere nia kondisaun.
”Ha’u husu ba sarani sira hotu katak labele fiar lia-anin ne’ebé mak namkari ona iha mídia sosiál kona-ba Amu Domingos nia mate, tanba daudaun ne’e Amu Maubere nia kondisaun iha hela médiku sira-nia liman no sarani sira favór reza, la’ós espalla fali notísia falsu iha públiku,” Padre Juvito do Rego afirma ba jornalista sira iha arredór Intensive Care Unit (ICU) HNGV, Bidau, segunda ne’e.
Nia dehan orasaun importante ba Amu Maubere hodi Maromak tulun ho di’ak, la’ós hotar, ne’e pekadu.
Notísia relevante: Padre Domingos Maubere ho kondisaun grave iha HNGV
Padre Juvito apela mós ba mídia sira-ne’ebé publika imajen kona-ba Amu Maubere nia tratamentu, favór hamoos tiha iha idak-idak nia mídia, tanba Amu Kardeál la fó autorizasaun atu publika ida-ne’e.
”Labele publika. Ida-ne’e privasidade ema-nian. Tenke respeita ema nia dignidade. Bainhira iha ona vulnerabilidade mós nafatin respeita,” Amu Juvito realsa.
Entretantu, daudaun iha arredór ICU marka prezensa husi Bispu Dioseze Baukau, Dom Leandro Maria Alves, membru Parlamentu Nasionál, Madre, Padre, sarani sira inklui família.
Jornalista: Felicidade Ximenes
Editór: Xisto Freitas da Piedade
