DILI, 12 Maiu 2025 (TATOLI)—Prezidente Repúblika (PR), José Ramos Horta, vizita padre Domingos Maubere hodi observa Bibi-atan ne’e nia kondisaun iha sala Intensive Care Unit (ICU) Hospital Nacional Guido Valadares (HNGV), Bidau, segunda ne’e.
“Ha’u mai haree direta ita-nia Padre Domingos Maubere iha sala ICU. Husu ita hotu atu reza, tanba ita hotu hein de’it ona,” José Ramos Horta, dehan ba jornalista sira iha arredór sala ICU.
Xefe Estadu tenik médiku sira iha HNGV halo hotu ona esforsu atu nia labele hetan sofrimentu, maibé lahatene kualker momentu mak Maromak bolu entaun mak ne’e ona no timoroan lakon daudaun ona ema ne’ebé konsideradu hanesan eroi boot.
Notísia relevante: Padre Domingos Maubere ho kondisaun grave iha HNGV
To’o oras ne’e, iha Hospital Nacional Guido Valadares, sarani sira kontinua nakonu no tama bá ICU hodi vizita Padre Domingos Maubere ne’ebé baixa hela iha laran. Madre, Padre no sarani sira seluk mós kontinua halo orasaun ba Amu Maubere iha arredór ICU nian.
Jornalista: Felicidade Ximenes
Editór: Xisto Freitas da Piedade
