DILI, 13 Maiu 2025 (TATOLI)—Dom Virgílio Kardeál do Carmo da Silva, husu sarani sira kontinua reza ba Pároku Parókia Sagrado Coração de Jesus Bekora, Pe. Domingos Maubere, ne’ebé daudaun ne’e baixa iha sala Intensive Care Unit (ICU) HNGV.
Hafoin fila husi Vatikanu, Dom Virgílio diretamente vizita Padre Domingos Maubere iha sala ICU Hospital Nacional Guido Valadares (HNGV).
“Ita hotu hatene katak Padre Domingos Maubere iha ICU. Banhira ha’u to’o mai, ami reza no hananu kona-ba 13 Maiu, nia (Amu Maubere) matan loke no nia loke ibun hakarak kanta hamutuk ho ami. Entaun, ida-ne’e ha’u hakarak dehan ba ita hotu atu kontinua reza ba Padre Maubere no ita-nia dezezu Amu Maubere rekupera fali,” Dom Virgílio dehan ba jornalista sira, iha arredór ICU HNGV, Bidau, tersa ne’e.
Iha fatin hanesan, Reprezentante Arkidioseze Dili, Pe. Juvito do Rego, husu ba família no sarani sira hotu atu limita tama ICU hodi vizita Amu Maubere.
“Ita labele barak-barak tama ona ba ICU hodi vizita Amu Maubere, tantu família no sarani sira. Só família na’in-rua mak hein dadeer, depois kalan na’in-rua mak hein, tanba médiku sira fó orientasaun ida-ne’e atu evita lori bakteria sira tama, tanba padre nia kondisaun fraku ona. Banhira virus ida tama komplika liután ba nia moris. Se ita hadomi nia, fila bá uma halo orasaun no mós iha kapela HNGV,” Amu Juvito fó hanoin.
Notísia relevante: Padre Domingos Maubere ho kondisaun grave iha HNGV
Entretantu, sarani husi Parókia Sagrado Coração de Jesus Bekora, Maria de Fátima da Conceição Soares, haktuir katak horisehik no ohin nia mai iha-ne’e (HNGV) halo orasaun, maibé ohin regra ne’ebé Padre Juvito fó-sai ne’e katak labele mai ona, entaun hanesan sarani sei halo orasaun iha uma.
“Ohin Amu Juvito husu sarani sira atu diminui númeru vizita bá Amu Domingos tanba ho kondisaun fraku. Labele mai barak atu evita bakteria. Entaun, ami idak-idak iha uma hodi halo orasaun nune’e Padre Domingos nia saúde bele rekupera,” Maria de Fátima konklui.
Jornalista: Felicidade Ximenes
Editór: Xisto Freitas da Piedade
