VIKEKE, 13 Maiu 2025 (TATOLI)—Governu liuhusi Ministériu Agrikultura, Pekuária, Peska no Floresta (MAPPF) liuhusi Diresaun Mekanizasaun fó kapasitasaun ba grupu agrikultór sira kona-ba jestaun operasaun hand tractor FTI 1000.
Notísia Relevante: PAM Viqueque entrega “hand tractor”-tratór boot 30 ba administradór postu sira
Xefe Seksaun Mekanizasaun husi MAPPF nasionál, Francisco Filipe Gama, hatetn objetivu ba kapasitasaun ne’e atu hasa’e grupu sira-nia koñesementu kona-ba regra utiliza ekipamentu hand tractor FTI 1000 ne’ebé fulan kotuk MAPPF distribui ba autoridade Vikeke hodi distribui ba agrikultór sira.
“Uza ekipamentu sira-ne’e tenke uza regra no kritéria sira-ne’ebé iha. Atu nune’e ita-nia agrikultór sira utiliza ekipamentu sira-ne’e bele dura ba tempu naruk. Bazeia ba programa MAPPF atu eleva servisu agrikultura liuliu ba sistema mekanizasaun, ita hotu hatene katak ohin loron era modernizasaun ne’ebé ita tama teknólojia inovasuan foun, hand tractor sira-ne’ebé distribui ona ba grupu sira-ne’e inovasaun,” Francisco Filipe Gama hateten ba Agência Tatoli iha salaun postu administrativu Vikeke Vila, ohin.
Nia dehan, hand tractor FTI 1000 uza gazolina ho tipu ne’ebé ki’ik tanba ne’e mak ekipa mekanizasaun oferese kapasitasaun ba grupu sira hodi hatene ba operasaun.
“Banhira ita la fó kapasitasaun hand tractor nian ba ita-nia agrikultór sira, dalaruma sira uza bele mosu fallansu iha kampu servisu. Tan ne’e, mak ami mai hodi introdús ekipamentu hand tractor nian ba grupu sira hodi uza,” nia hateten.
Diretór Servisu Agrikultura Munisípiu Vikeke, Olivio Soares Freitas, hateten kapasitasaun ba mekanizasaun ba grupu agrikultór sira-ne’e atu sira bele iha koñesementu ba operasaun hand tractor ne’ebé foin lalais Governu fahe ba grupu agrikultór sira.
“Tanba ne’e, ita-nia ekipa mekanizasaun sira mai fahe koñesementu hand tractor nian, atu ita-nia grupu sira bele halo operasaun hand tractor ba fila rai toos no natar sira ho lolos. Ha’u husu agrikultór sira uza oportunidade sira-ne’e hodi aprende,” nia hateten.
Tuir dadus, hand tractor ne’ebé koloka mai munisípiu Vikeke totál hamutuk unidade 30 ne’ebé distribui ona ba postu lima no distribui ona ba grupu agrikultór sira hodi utiliza hand tractor ba natar no toos.
Administradór postu Vikeke Vila, Leopoldo da C. Alves, hato’o agradesementu ba ekipa mekanizasaun nasionál ne’ebé mai munisípiu Vikeke hodi oferese kapasitasaun ba grupu agrikultór sira-ne’ebé simu ona hand tractor.
“Liuhusi formasaun sira-ne’e, hafoin ita bele hatene kualidade hand tractor nian no oinsá utiliza hand tractor ho di’ak hodi ita bele hasa’e ita-nia ekonómia husi toos no natar. Tanba ne’e, ha’u husu agrikultór sira fó atensaun ba formasaun sira-ne’e hodi sai hanesan bukae ida ba agrikultór sira iha munisípiu Vikeke,” nia dehan.
Jornalista : Vitorino Lopes da Costa
Editór : Cancio Ximenes
